Aizawl July 13, 2023 : Brigadier B.S. Gill, Vir Chakra chuan a nupui, March 11, 2023-a boralta Kamal Gill hriatrengna atan Bolero camper/ambulance pek a duh tih a sawi hnuah hemi ti hlawhtling tur hian Chandigarh atanga rawn chhoin Diltlang tan hian thil pek hi a pe ta a ni.

Chandigarh atangin Kilometre 3500 zet rawn zinin Aizawl a rawn thleng a, heta tang hian Kilometer 400 a hla Diltlang, Lawngtlai district chu a thleng leh a ni. He hmunah hian 1972 khan post commander a lo ni tawh. He khua tan hian a rawn thlen ambulance nuai 20 man chu a hlan. Khaw mipui te chuan Brigadier hi an lo lawm thiam hle a, mipui te hian hlang siamin an lo zawn a ni. 

Gill leh Mizoram hian inzawmna thuk tak an nei a, 1971 atangin sipai angin Diltlang, Lawngtlai district ah hian hun a lo hmang hrep tawh a, 1973 thleng khan a awm a ni. June ni 22, 2023 khan he khuaah hian kir lehin a thil pek hi a pe leh a ni.

Diltlang a chhuahsan leh tun tuma a lo kir leh inkar hian he khua hi vawi 10 vel a tlawh tawh a ni. 

Big. BS Gill a pa  Nachhatar Singh Gill chu A-class contractor niin Mizoram kawngpui siamin hna a thawk thin a, heng hun hi 1954-1959 a ni. Gill hian kum 1971 -1973 inkarah sipai officer angin hna a thawk ve thung a. Hetah hian a la tawp mai lo. Kum 29 hnuah BS Gill a fapa Jagminder S Gill chuan a pa hnung zuiin sipai officer thoin 1 Assam Rifles (Lushai Hills Bn) ah thawkin  2002-2004 chu a hun a hmang leh a ni.

April ni 20, 2011 khan khatih hunlaia Governor MM Lakhera chuan Roll of Honour chawimawina BS Gill hnenah hian a pe a. A pek chhan chu 1954-2004 inkarah an chhungkuain Mizoram tan an lo thawh tawh vang a ni. Hemi tum pawh hian  Gill chuan Diltlangah medical camp huaihawtin  Rs 50,000 a lo pe tawh bawk a ni.

(He news hi East Mojo atanga lak niin June 22,2023 a thil thleng a ni)