British MP vit hlum, police-in firfiak chetnaah an ngai

Admin - Oct 17, 2021

Kum 1983 atang khan Parliament-ah a lut tan

MP hlun Sir David Amess-a

Conservative MP hlun tak, Sir David-a hi kum 40 zet an ram rorel khawlah hian a lo thu tawh a, kum 1983 atang khan Parliament lut tanin a hmasa berah hian Basildon bial atanga thlan tlin a ni.

Kum 1992 inthlan thleng pawh khan he bialah hian a la chelh zui zel a; mahse, kum 1997 khan a bul lawka Southend West bial lamah a insawnsan.

Roman Catholic chhungkua atanga sei lian a ni a, politics lamah hian social conservative an tih ang hi nau tihtlak dona lamah leh rannung ta tana campaign nasa thin tak a ni.

Southend-ah hian a hming tha hle a, khua (town) ni mai thin chu nasa taka beiin rei tak hnuah khawpui (city) dinhmunah a hlang kai a ni.

Sir David-a hi constituency surgery an tih, a bial chhunga mipui (voter)-te nena inkawmhona hun an hman laia thah a ni a. Biak inah Zirtawpni chhun dar 12:05 (India sanaa tlai dar 5:35)-ah beih niin an that ta a ni.

British Conservative MP Sir David Amess chu Zirtawpni khan thah a ni a, a titu chetna hi firfiaka chetna ni ngeiin police chuan an sawi.

Sir David-a hi Leigh-on-Sea, Essex-a a bialah Zirtawpni khan vawi tam tak vih niin a thi.

Metropolitan Police chuan Islamist kal firfiakte nena inzawmna nei thei a nih thu an sawi a. A hmunah hian British tlangval kum 25 mi chu mi thattua puha man nghal a ni.

Home Secretary Priti Patel chuan Sir David-a uina thu sawiin, ‘mipuite thian’ a nih thu leh ‘a duh ber hna a thawh laiin thah’ a nih thu a sawi bawk.

Prime Minister Boris Johnson leh Labour hruaitu, Sir Keir Starmer te chuan Inrinni zing khan amah zahna leh thlahna pangpar an dah.

Patel-i leh Commons Speaker Sir Lindsay Hoyle pawhin Leigh-on-Sea-a Belfairs Methodist Church tualah pangpar an dah bawk.

Patel-i chuan police-te chu an MP-te hnena venhimna an pek an kalpui dan tikhauh lehzual turin an ti nghal tih a sawi a, rualkhai zawka kalin an MP-ten an bial chhunga mi an hmuh duh leh an fanna erawh tihbuai chuan loh tur a nih thu a sawi.

“A ngaiin kan kal ang a, zalen takin, mipui rorelna kan nih angin kan kal zel ang,” a ti a. “Mi tu emaw leh tute emaw ngaihdan avang mai maiin kan chetvelna a titawp dawn lo,” a ti.

Met chuan an officer-te chuan he pawikhawihna hi chhui zuiin London khawpuia hmun pahnih chu an dap tawh tih an sawi a, man belh erawh an nei lo.

Essex-a an kuta awm mek, tualthattua an puh hi amaha che ni ngei chuan an ring a; mahse, mi dang chet tum an la awm thei nia hriat a nih avangin venhimna khauh takin an kalpui a, hma an la mek zel.

Sorkar hnen atanga BBC-in a hriat dan chuan pawikhawihtua puh hi British chu a ni ngei a; mahse, Somali lam a ang a, pem lut a nih rin a ni.

Met chuan firfiak chetna angin an chhal a, chhui zui hna hi Counter Terrorism Policing-in an thawk mek.

Police chuan, “Tuna hriat theih chinah chuan Islamist kal firfiakte nen inzawmna nei ni theiin a lang,” an ti.

Officer-te hian mi tu pawh, an thil chhui pui thei tur thil hria leh CCTV, dash cam leh video doorbell atanga lak ang chi neite chu an hnena pe thuai turin an ngen.

Share now