Aizawl December 28, 2022: ZPM Thalai chuan Cheng nuai 253 senga Bualpui NG PHC sak that hna kal mek chhe lutuk chu, khawtlângin vawi tam an vaukhan tawh hnu pawha chhe taka an sak chhunzawm zel avanga YLA-in hnatlang kovin an vawchhia niin thuchhuah an siamah an tarlang a, MNF sawrkar chu sumdawng sawrkarah an puh.

ZPM Thalai chuan hetiang thil a thleng Mizoram sawrkâr tân mualphothlâk tak nia an ngaih thu sawiin, "MNF sawrkâr hnuaiah contract hna chhe lutuk hmuh tur a tam em em mai hi MNF sawrkârin Mizoram hi mahni ta ang taka a enkawl loh vângah leh sumdawng rilru a put vangah kan ngai," an ti.

MNF party chu sumdawng sawrkâr-ah puhin, "Hun reilote chhûnga sumdawnna atâna sawrkârna chelhtu ni-a inhriatna an neih len êm avângin an thiltihah ram tâna thahnemngai taka tih tak takna an nei lova, hna tha an thawk thei lo; hun pui boruakah pawh mipuite'n sawrkâr chetna hnu pawr umzui reng renga hun an hmang hi mipuite kan khawngaih hle a ni," an ti.