Aizawl June 17, 2023 : Aizawl District Congress Committee (ADCC) buatsaihin Lal Thanhawla Auditorium-ah Organisers’ Political Training neih a ni a. MPCC Treasurer Dr. Lalmalsawma Nghaka chuan party dang buai avangin an party tan buh seng tur a tam a, a seng khawm tur lam an indaih lo chho niin a sawi.

MPCC Treasurer Dr. Lalmalsawma Nghaka chuan Congress party chu a thawh kan mek thu sawiin, “Zoram mipuiin Congress party-ah an rinna an nghat mek a. Party dang chhungkaw buaina avangin Congress party-ah mi tam tak an lo lut khawm mek a. Buhseng tur a tam a, a sengtu tur lam hi kan indaih lo chho tan mek a ni,” a ti.

MPCC Treasurer chuan, “Ramin hma a sawn theihna tur chuan sawrkar tha kan mamawh a, sawrkar tha nei tur chuan kalphung (system) tha a ngai a ni,” a ti bawk.

MPCC Spokesperson Dr. Lallianchhunga chuan ‘Tang puihna’ chungchang sawiin mi taima leh thawkrimte din chhuahtir chu a tum ber a ni tih a sawi a. “Tang puihna hmangin kuthnathawktute hi kan puih bakah, an thar chhuahte hralh chhuahna tur leh sawngbawlna tur kan ngaihtuah dawn a ni,” a ti. 

ADCC President Lalhmingthanga Pachuau chuan, “Congress party hi party inkaihhruaina nei mumal ber kan ni a. Kan elpuiten ‘in tho chhuak tawh lo vang’ an tih pawhin Pathian zarah kan organization inrelbawl dan tha avangin kan tho chhuak leh mai thin,” a ti bawk.