Maharashtra-a kawngpui liana bus kangah naupang pathum telin mi 25 vel an thi a, mi dang pariatin hliam an tuar bawk.

Pune pana tlan bus-ah hian mi 33 chuang an chuang a, Inrinni zing dar 1.30 vel khan Samruddhi-Mahamarg Expressway-a an tlan laiin chhiat an tawk niin thuneituten an sawi.

Police chuan bus hian Buldhana district-ah ban a su a, a let zui niin an sawi a. “A khalhtu a dam chhuak a, a ke a puak a, ban a su zui ta niin a sawi,” an ti.

A tlukna lamah a tuialhthei bawm a pawp a, diesel put leh mei siam thei thil tek awm inmanin a kang zui ta nia an ngaih thu an sawi.

Bus hi a kawngka lam delhin a let a, a hawn theih loh va, hei vang hian tute mah an chhuak thei lo niin police hian an sawi bawk. 

A dam chhuak mi pariatte hi driver cabin-a chuangte vek an ni a. A hma darthlalang tikehin an chhuak thei a, an mi phurhte chhuahna kawngka erawh a hawn theih loh a ni.

Thi zingah hian a khalhtu pakhat zawk leh bus tifaitu (cleaner) an tel bawk.

“Chetsualnaah hian mi 25 an kang hlum a. A khalhtu telin hliam tuarte chu damdawi inah lak an ni tawh,” tiin Sunil Kadasane, Superintendent of Police, Buldhana chuan a sawi.

Thubuai pawh ziah luh niin chhui zui mek a ni a. “Tuna hna hmasa leh pawimawh ber chu ruangte hi tute nge an nih hriat tum phawt a ni a, an chhungte hnena hlan tum a ni,” tiin Kadasane chuan a sawi.

Prime Minister Narendra Modi chuan he chetsualna thleng chungchangah hian nunna chân an awm chu ‘a pawi tak zet’ tiin a sawi.

Maharashtra Chief Minister Eknath Shinde pawhin lirthei chesual chu pawi a ti tak zet tih a sawi a, thite chu sorkarin Rs nuai 5 theuhva a ral tur thu a puang bawk.

“Chetsualna tuarte a rang thei ang bera pui turin thupek a chhuah nghal a, chief minister hian hliam tuarte pawh sorkar senso tura a tha thei ang bera enkawl turin a ti bawk,” tiin a pisa chuan thu a chhuah.