DOWNLOAD OUR APP

Read latest news on your phone
app-store

Canada mosque-a inkhawmten anmahni beih tum lo bei let

Mar 20, 2022

Canada mosque pakhata Inrinni tuk (India-a zan lam)-a tawngtai inkhawm lai hrei leh bear spray hmanga beih tum ni ngeia hriat chu inkhawma telten bei letin an tudawl a, police-in an man zui nghal. A tum angin che lo mah se mi tlema zawng erawhin hliam tenau an tuar a, an tih chhan hriat a la ni lo va, police chuan thubuai paruk an siamsak.

Canada mosque pakhata Inrinni tuk (India-a zan lam)-a tawngtai inkhawm lai hrei leh bear spray hmanga beih tum ni ngeia hriat chu inkhawma telten bei letin an tudawl a, police-in an man zui nghal.

Inkhawmnaa tel pakhat chuan a hrei ken lai hi lo chhuhsakin police an thlen hma zawng chu an lo hreng bet niin niin tual chhung chanchinbute chuan an tar lang.

Mississauga daia thil thlengah hian mi beih tuma puh, mipa kum 24 mi hi man nghal a ni.

Inkhawmnaa tel mi thenkhat chuan bear spray avang hian hliam tenau an tuar niin mosque puithiam (imam) chuan a sawi.

Inkhawmnaa tel pakhat chuan an thil tawn chu a hlauhawm hle tih a sawi a, mi pakhat, hrei leh bear spray keng a hmuh ve hmain te thawm a hria a, a va hmuh chuan mi pathumin an lo bei let tih a sawi.

“An inbeih lai hian spray hi a phuh chhuak a, tlar hmaa thuten an rawn hriat ve chuan tlangval pakhat chu tho chhuakin a hrei ken chu a hman hmain chhuhsak ta a ni,” tiin Noorani Sairally chuan Canadian chanchinbu, The Globe & Mail a hrilh.

Hrei chhuhsaktu hian anmahni beih tumtu chu a a man bet a, police an thlen hma chu a lo chelh niin a hmutu hian a sawi.

“Inkhawmnaa telten an tawrh hmain huaisen takin a tih tur an lo dang a ni,” tiin imam Ibrahim Hindy chuan a sawi.

“Kan kohhran hi kan keh darh ngai dawn lo va, min tihchhiat tum chu kan lo dang kir zel ang,” a ti bawk.

Police chuan an mi man hi Mohammad Moiz Omar-a a nih thu leh thubuai paruk an siamsak thu an sawi a, heng zingah hian ralthuam nena chea mi nunna tana hlauhawm leh mi tihnat tuma chea puhna pawh a tel.

Hetianga a chet chhan hi hriat theih chiah la ni lo mah se ‘mi huatna bik riau’ avanga ti ni theia an ngaih thu an sawi.

Prime Minister Justin Trudeau chuan hetiang beihna thleng chu a dem thu leh mosque-a lo awmten huaisen taka an beih letna a fak thu a sawi.

Canada-a Muslim awmte hi vawi eng emaw zat beih an lo tawng tawh thin a. Heng zingah hian kum 2017-a Quebec City-a mosque beihna, mi paruk thihna leh mi pariatin hliam an tawrhna pawh a tel.

Nikum khan Muslim chhungkaw pakhata mi pali chu London, Ontario-a an lirthei sutsak niin an lo thi tawh a, police chuan Islam huatna avanga tihluiha thleng niin an sawi.

Share now