Aizawl; Eiruk thubuai chhuitu Mizoram Lokayukta chuan thubuai 29 a dawng tawh a, chu'ng zinga 8 chu titawpin, CBI hnen a pek thubuai chhui tur 2 chu Mizoram sawrkarin chhui phalna a la pe lo.

Lokayukta chairperson C. Lalsawta'n ZALEN a hrilh danin, Mizoram Lokayukta-in thubuai 29 a dawn tawh zinga thubuai 11 chu ACB lam in preliminary inquiry an ti mek a, thubuai 8 ah regular FIR ziahluh ni tawhin, regular investigation nei turin Lokayukta chairperson in order a chhuah tawh a, report hriat theih hnuhnung ber ah thubuai tihtawp pariat a awm tawh bawk.

Regular FIR ziahluh tawh zinga thubuai 2 chu Lokayukta in CBI ah regular investigation ti turin order a siam a, heng thubuai te hi CBI lam pawhin chhui turin an pawm tawh a, state sawrkar hnena chhui phalna an rawn dil erawh phalna pek an la ni lo thung.

Thubuai tihtawp zinga pakhat chu thubuai thehluttu ten CAG report photocopy an thehluh a ni tih sawiin, Lokayukta chairperson chuan, CAG report chu Assembly session a thehluh thin a nih vangin Assembly lam thil a ni tih a sawi a, hemi vang hian Lokayukta tan direct a hma lo lak a remchang lo a, Assembly in chhui ngai an tih chuan FIR an thehlut thei niin a sawi.

Lokayukta danah ni 45 chhungin preliminary inquiry zawh tur a nih laiin ACB lamin an report Lokayukta ah an thlen hman meuh lo a, hei hi Covid 19 hripui leng vanga hnathawh a khaihlak nasat vang a ni pakhat tih C. Lalsawta chuan a sawi.