Aizawl June 24, 2023 : Vawiin khan Chakhei bial MDC by election neih turah Adviser to Chief Minister TBC Lalvenchhunga chuan Chakhei bial chhunga khaw hrang hrang Chakhei, Chheihlu leh Siasi khuate a tlawh a, heng khuaahte hian vantlang inkhawmah thusawina hun a hman bakah bial chhung mamawh leh harsatnate a hmunah a en nghal bawk.

TBC Lalvenchhunga chuan,"Kan ram politics-ah danglamna thlen a ngai tiin kan au thin a, campaign lai leh Pathian zara sawrkarna kan chan hnu hian danglamna kan hmu nasa hle in ka hria, hna hi kan thawk tak tak a, mipui leh sawrkar hnathawkte thlawpna pawh kan dawng nasa em em a ni. Ram rorelna hi tih mai mai a ni lova, rim taka hnathawh a ngai a ni. ZPM hian kan tihhlawhtlin theih loh tur kan tiam ve ngai lova, kan policy leh ruahmannate a hlawhtlinna kan hmuh hunah a rah sengtu leh chhawrtu tur chu mipuite an ni a, ZPM chuan mipuite lawmna hi kan zavaia lawmmna ah kan chhiar a ni,"a ti.

"ZPM hian sum hman dik kan ngaisang a, sum thawk chhuak thei aiin thawk tha kan ram hian a mamawh zawk. Central-ah mi kan tlawn ngai lova, tlawn pawh kan tum lo a ni. Kan ram kan enkawl dan turah hian kan chiang a, huaisen takin kan kal zel dawn a ni. Central-a zawm neih leh neih loh avang hian kan chanvo hi a bo dawn lova, Central atanga kan sum hmuhte hi rinawm taka hman a nih chuan kan ram tan hmasawnna tluantling a awm thei a ni," a ti bawk.

Adviser to Chief Minister chuan," Inthlan hmain ka eiru lovang tiin kan au thin a, tunah chuan ka eiru lovang ti mai lovin kan hmuh phakah an eiru tur a ni lo tih hi kan infuihna a ni. Thingtlang politics leh khawpui politics hi a danglam tlata hriatna hi kan dah bo a hun tawh a, kan mamawh hi a in ang vek a ni. Tui intur thianghlim, zirna tha, inkalpawhna tha, eng tha leh a dangte, heng zawng zawng hi khawpui leh thingtlang in kan mamawh vek a ni a, kan danglam thei tak tak lova, kan inang tlang vek a ni," a ti.

"Rorelna tha hnuaiah chuan kan chanvo hi a bo thiang lo a, sawrkar hian tha taka hna thawh chuan kan chanvo te a nihna takin kan hmu dawn a ni. Sawrkarin a tih tur a tih loh a, thil a nihna tur a nih loh hian kan chanvo a bo thin a ni," a ti bawk.