August 30, 2022; Central Executive Committee  2021-2023) meeting vawi 16 na chuan ruihhlo do tur, 'Central Anti Drugs Squad' (CADS) a din. Central YMA President R. Lalngheta chuan drugs bikah hma an la dawn tih a sawi.

Nizan dar 7:30 khan Central Executive Committee (CEC) chu Central YMA Office, Tuikhuahtlangah an thukhawm a. CEC meeting chuan ruihhloin kan ram min run mekna te thlir chungin Central YMA hnuaiah ruihhlo do tur - Central Anti Drugs Squad (CADS) din leh a remti a, September 9, 2022 Zirtawpni-ah memberte lawmna leh hlanna hun hman a ni ang.

CADS term hi thla hnih chhung zel ni tura ruahman niin, member 50 zel an awm ang a, CADS member turin Aizawl khawpui chhunga Branch YMA 108 atangin mi 1 theuh ruat tura beisei an ni.

Home minister Lalchamliana chuan, Central YMA ten Supply Reduction Service (SRS) dina ruihhlo do beihpui an thlak kha a hlawk thu leh CYMA leh SRS in ruihhlo an do dan ang kha tunah hian Mizoramin a mamawh hlea a hriat thu tunhnai khan a lo sawi tawh.

CADS an din chung changah CYMA president R. Langheta chuan, drugs bikah hma an la dawn tih sawiin, Mizoram a ruihhlo tam zia mipui leh kohhran atang thleng a sawi a nasat tawh thu te a sawi. CADS din thar leh tur chu Aizawl city branch hruaitute an kohkhawm ah pawh pawm a lo ni tawh tih sawi bawkin, "Kan ramah ruihhlo ti thar an tam avangin, supply reduction chauh ni lo, demand reduction ah pawh hma kan la dawn a, awareness pawh kan ti nasa ang," R. Langheta chuan a ti bawk.

• • September - October chhunga hruaitu turte:
    Convener : Roneihthanga, Fin. Secretary
    Asst. Convener : K. Darthantluanga, CEC
    Secretary : Lalsawma Ralte, CEC
    Asst. Secretary : R. Lalchhandama, CEC