Aizawl September 16, 2022 : YMA Chaltlang Branch-in a kum 75 tlin lawm nana hma an lakna pakhat atan  ruang vawn thatna (refrigerated mortuary) an bun thar a, vawiin khan Bialtu MLA Vanlalhlana’n Chaltlang Thlanmual-ah a hawng. He mitthi dah thatna hi veng dang tan pawh hman an phal a ni.

Ruang vawn thatna neih hi chhiat tawk chhungte, hmun hla zawka awmte’n ruang an hmuh hmaa thlah liam ngai thin tih tlem leh tihziaawm beiseina avanga an tih a ni, Chaltlang Branch YMA chuan chhiatni inkaihhruaina pawh an siamrem nghal a ni.     

Chhiat tawk an awm changa mitthi chhungte a tuk mai a lo thleng thei dinhmuna ding, lung dam taka an inthlah theih mai tur te, ruang vawnthatna neih loh avanga lung dam lo taka invui liam a ngai thin chu mitthi chhungte tan a nat theih em avangin Chaltlang Branch YMA chuan hetiang zawnga kalpui hi an tum ta tih an sawi. 

Vengpawn mite pawhin an hmang duh a nih chuan mortuary hman ziakin an dil thei ang a, zan khat/ni khat dah man Rs. 2,000/- bituk a ni a, a aia rei an dah chuan zan khat/nikhat ah Rs.1000/- zel chawi belh tur a ni ang a, zan/ni thum bak indah hi phal a nilo ang, tiin a rel bawk. 

Chaltlang Branch YMA chuan kumina Branch YMA kum 75-na an lawm kal mekah lawmna chi khat atan thil la awm ngailo leh tangkai tur neih duhna an nei a, an Branch Executive Committee ruang vawnthatna neih ni se ti in a rel ta a.

Company hrang hrang an dawr hnuah, transportation, after sales service tha ber a a hriat Eskay Refrigeration, Guwahati chu an thlang ta a ni. Ruang vawhthatna thar hi feet 7-a sei niin ruang vawnna hmun hi inches 30-a zau, inches 49 a sang ni a. Ruang vawnna hmun hi 2-5℃ a vawt niin, cheng 1,94,700/- man a ni (discount cheng 4,700/-). 

Chaltlang Branch YMA in mortuary neih theih nana senso atan Vanlalhlana, Aizawl North 1 Bialtu MLA chuan Platinum Jubilee lawmna thilpek atan a man tur cheng 2,00,000/- a MLA Fund atangin a tumn sak a, Mortuary Cabinet dahna tur pindan siam nan Pu Vanlalngaihsaka (IAS) te chhungin an fanu NI. Vanlalchhandami (L) hriatrengna turin cheng 70,000/- an tum sak bawk.