Aizawl: District Rural Development Agency (DRDA) Champhai buatsaihin tuihna humhalh leh kan tui tlante a lo thianghlim zawkna tur atana hmalakna Jal Shakti Abhiyan 'Catch The Rain' Campaign kaltlang Rally thawhkhatna chu nimin khan Tuipui hnar-ah Bawrhsap Maria C.T Zuali, Chairman, District Water and Sanitation Committee hova neih a ni.

Kalkhawmte hmaah thusawiin Bawrhsap Maria C.T. Zuali chuan, "Phairamte aiin ruahtui tla kan dawn danah vannei zawk angin lang rih mah ila tuihna leh ram ngaw humhalh kawngah tan kan lak loh chuan nakin lawkah chuan ruahtui dawn tur pawh kan la nei lo mai thei a ni," a ti a.  Rual u deuh ten Champhai tui tlan ber Tuipui tuihna that thin thu an sawi chu hmuh theiha a kiam chak hle thu sawiin, sawrkar laipui duan tuihna humhalh kawnga hmalakna Jal Shakti Abhyan hnuaia 'Catch the Rain' Rally  khuhhawnna chu Tuipui tui  kiam chak zia hre tura a hnara kalchilha  buatsaih a ni tih a sawi bawk.

He hun kaihruaitu R.Lalnghakliana, PD DRDA Champhai chuan tuihna kiam zel leh tui harsatna nasa tak awm chho chu sawrkar laipuiin a vei thu leh hemi kawnga hmalakna turin Ministry of Rural Development pawhin Jal Shakti Abhyan hnuaiah ruahtui tla dahkhawl leh tui hna humhalh kawnga hmalakna Catch the Rain Campaign a kalpui thu a sawi a. Kumin March ni 22 atanga November 30 thlenga kalpui tum a nih thu leh April-May thla chhoah inzirtirna Awareness Campaign neih tuma ruahmanna siam a nih thu a sawi bawk.

Catch the Rain Rally thawhkhatna khuhhawnna program tawi buatsaih zawh hnu hian Tuipui hnar dung tluan ke a zawh chhoh niin, tuihna humhalh kawnga hmalak ngai hrang hrangte enfiah a ni a. Tui dahkhawl theih dan turte, hnâwl dang tur check dam siam dan tur leh bawlhhlawh paihna tur ni lova paih thin avanga lui kawr bawlhhlawh chak ziate leh mipuite inzirthar tul ziate a hmun ngeiah kala enfiah a ni.