June 23, 2023; Nimin khan Champhai Police-te chuan methamphetamine mum Nuai 2 chuang an man a. An rual hian mi 3 an man tel nghal bawk.

Thulaknain a tarlan danin Zokhawthar atanga Aizawl pan lirthei Khankawn Police Checkgate paltlang tur police te'n an endik a. Lirthei hnuaia pindan (compartment) an siam chawp atangin methamphetamine mum hi (bundle) 20 an hmu chhuak a.

He ruihhlo phurtu lirthei khalhtu chuan Zokhawthar atangin pawisa hlawha Khawzawl thleng khalh tur niin a insawi a. Police-te hian an chhuizui hnuah Khawzawl-a he lirthei lo changtu hnam dang pahnih -  Rajul Haque (39) leh Abdul Halim (28), Karimganj, Assam-a cheng ve ve te chu an man bawk niin thulakna chuan a tarlang a.

CCN in a tarlan dan chuan mi 3 ND&PS Act hmanga thubuai siamsak niin, Champhai Police te chuan he thu buatsaih lai hian inhnamhnawih dang an awm em tih an chhui mek a ni. Methamphetamine an man hi a vaiin mum 2,02,000 a ni a, tualchhunga a hralhna rate anga chhutin cheng Nuai 400 aia tam niin a neitua puhte hi District Court-ah hruai nghal an ni.