AIIMS Director Dr Randeep Guleria chuan, “India ramah Covid-19 thawh thumna lo thleng tur hi pumpelh theih a ni lo a, tun atanga chawlhkar ruk atang riat hnuah kan hmachhawn tan mai thei,” a ti.

“Inkharkhipna thlahdul a nih hnuah Covid-19 laka inven tumna nei lo a tam zawk an la ni leh tho a. Thawh khatna leh hnihna kan hmachhawn hnuah pawh mipuiin kan khawsak danah inzirchhuahna chang kan la hre lo va. Mipui an pungkhawm a, tun atanga reilo teah inkaichhawnna rûnpui hi a lo thleng leh thuai ang. Thawh thumna hi pumpelh theih a ni dawn lo a, tun atanga kar ruk atanga riat inkarah a lo thleng ang, a aia rei hret pawh a ni thei,” tiin a sawi. 

“Hri kai lo tura kan awm dan kan siam rem thei emaw, mipui pungkhawm nasa lutuk tur kan ven theih leh theih loh dan emaw azirin a thawh thumna kan hmachhawn hun tur a hril ang,” a ti bawk.

India ramah thawh khatna khan inkaichhawnna a chak vak lo a, thawh hnihnaah inthlak hlawkin kai a awl ta em em a. Tunah Delta variant a awm thar leh tawh a, hei hi inkaichhawn a awlsam lehzual thung.