Afghanistan khawthlang lam chu ni tam vak lo liam taa lirnghing na takin vawi hnih sawia mi sang chuang an thih hnuah a dangin a sawi nawn leh.

US Geological Survey (USGS) chuan magnitude 6.3-a na lirnghing hi Herat khawpui bul lawk atangin, lei hnuai km 6.3-a thuk atanga intan niin an sawi.

Thi leh hliam an awm erawh hriat a la ni rih lo.

UN hnuaia naupang lam changtu, Unicef chuan lirnghing hmasaa thi zinga 90% chuang zette kha naupang leh hmeichhia an nih thu an sawi.

USGS-in report an siamah lirnghing thar ber hi Afghanistan-a khawpui lian ber pathumna, Herat atanga hmarthlang lam km 30-a hla, Iranian ramri bul lawka intan a nih thu an sawi.

Inrinni hmasa khan lirnghing dangin Herat atanga km 40 vela hla, thingtlang district-a Zindajan a lo sawi tawh.

Hemi tum hian thingtlang in tha lo tak tak, lirnghing laka him lo tak takte chu a sawi chim vek a ni.

Mi tam tak an chin hriat lohvin an awm a, an khaw mite chuan suahdur leh bawngtuthlawh nen, kut lawngin mi bote an zawng hlawm.

Afghanistan hi kum 2021-a Taliban-in thuneihna an chan leh hnuah khan eibarah an hniam hle a, ram pawn atanga puihna an dawn thin tam tak chu Taliban duh lohna avangin a petuten an pe chhunzawm duh tawh lo.

An ram hi lir a nghinduhna lai a ni a, a bikin Hindu Kush tlangdung, Eurasian leh Indian tectonic plate intawhna laiah a sawi duh hle.

Nikum June-ah khan Paktika province chu magnitude 5.9-a nain sawiin mi sang chuang an thi a, mi sang tam takin chenna in leh lo an neih loh phah.