Vawiin Zote Honda Mizoram Premier League, Seasion 9 round 2 khelhah Chhinga Veng FC leh Chawnpui FC ten an khingpui an hneh. 

Zote Honda MPL match hmasa zawk chhun dar 12-a Chhinga Veng FC ten an khingpui Chanmari FC sihnih faiin an hneh a, inkhel hnuhnung zawk chawhnu dar 3-ah Chawnpui FC chuan sikhat faiin FC Venghnuai an hneh ve bawk. 

Chanmari FC hian an match hmasa berah Electric Veng FC hneh mahse Chhinga Veng FC lakah an tlawm. Chhinga Veng FC hian an match hmasa berah Mizoram Police FC nen goal awm lo in an inhneh tawk a, Chanmari FC lakah point 3 hlu tak an hlawk chhuak thung. Goal lut te hi First half leh Second half a lut an ni a, Chhinga Veng FC tan Lalthankhuma leh Jery Lalchhanchhuaha chuan an khung a ni.

Chanmari leh Chhinga Veng inkhel hi an in hnehtawkin goal chance pawh an nei zauh zauh a, team pahnih hian freekick an chhuih thiam tih hriat takin freekick atangin an chhuih lut teuh dun hle. Chawlhlawk hma minute 43-ah Thankhuma'n chiang zetin Johny-a corner pet chu a lo ti lut. Chawlhlawk a ni a, Chhinga Veng bawk an rawn che chhuak hmasa leh a, minute 49-naah Chhanchhuaha'n an goal hnihna mawi takin a rawn thun. Hun tawp thlengin goal a luh belh lo. Chhinga Veng FC midfielder  Lalthankhuma Duhvel chu Man of the match-ah thlan a ni.

RG Stadium-a inkhelh vawi hnihnaah Chawnpui chuan an khingpui Venghnuai sikhat faiin an hneh ve bawk. Goal awmchhun hi Liansanga'n minute 66-a a tih goal a ni. 

He inkhelhah pawh hian goal hlauhawm awm zauh zauh mah se an freekick chu a hlauhawm zual emaw tih tur a ni. Chawnpui leh Venghnuai hian goal thunna hun tha nei ve ve mah se an duh angin goal an thun thei lo. Chawnpui tan Tlanzova'n goal a thun teuh hle a, goal bar a pet per a, Venghnuai tan Vanlalthanga'n freekick atangin bar a pet per ve bawk. Goal awm lovin first half a tawp. 

Second half tan hnu minute 20-na bawrah Liansanga'n Chawnpui goal khatna leh goal awmchhun a thun a, goal dah a luh belh lo. Chawnpui FC midfielder Vanlalhriatzuala chu man of the match-ah thlan a ni.

Naktuk September ni 13, thawhlehni a inkhel tur te:

12:00PM Mizoram Police FC vs Electric Veng FC

3:00PM FC Bethlehem vs Aizawl FC