Aizawl June 8, 2024: Tualpui khawtlangin an buatsaih, Chief Minister Lalduhoma chawimawina hun chu nizan khan Tualpui Mual zawlah a kharna hun hman a ni. Minister ten Tualpui khaw tana an hmalakna tur te an puang.

Chief Minister Lalduhoma chuan hun lawmawm tak an hmang thei chu a vanneihthlak hle a ni, a ti a. He hun hmang tura an inbuatsihna kawngah Tualpui khawtlang chuan an theihna zawng zawng an hlan tih a hriatpui thu sawiin an chunga khawtlang thatna chu an chhungkuain an theihnghilh tawh loh tur thu a sawi.

Chief Minister hian Tualpui khawtlangin nikhat thil thuah Minister-te kaltlanga thilpek an dawn chu a tam thamin, a lawmawm hle tih a sawi a. Tualpui khua, miin an hriat ngai loh chu tunah chuan mi hriat hlawh a lo ni ta a, hei vang hian ram pum entawn tur an ni tih inhria a, khawtlang inrelbawlna pawh mite entawntlaka kalpui turin a ngen a ni.

Agriculture Minister PC Vanlalruata, PWD Minister Vanlalhlana leh Dy Govt Chief Whip, Tuichang bialtu W. Chhuanawma te chuan Tualpui khuain Lalduhoma chawimawina hun an buatsaih an hmang ve thei chu lawmawm an tih thu an sawi a. PC Vanlalruata chuan Tuipui atanga Tualpui Rusi Ramah Agriculture Link Road an lai hmasa ber dawn tih sawiin; Vanlalhlana chuan Khawzawl atanga Rabung Peng kawng chu kumin chhung ngeia siam that an tum tur a sawi bawk.

Aizawl South - II bialtu MLA Lalchhuanthanga chuan Tualpui khawtlangin Lalduhoma lawmna leh chawimawina hun an buatsaiha a tel ve thei chu a lawm thu a sawi a. Tualpui khua chu khaw nuam tak, faina leh ramngaw humhalhna kawnga thawk tha khua an nihna chhawm nung zel turin a chah.

Chawimawina hun an hmannah khan Chief Minister hian School Education minister Vanlalthlana thil pek 'smart board' chu Tualpui High School tan hian a lo hlan tawh a, Tualpui khaw power lakluhna 11kv line thar siam nan P&E department chuan cheng nuai 113.94 an ruahman tih a sawi bawk.