Aizawl: Nimin khan Chief Secretary Dr. Renu Sharma chuan NLCPR/NEC hnuaia sak mek project pathum – Treasury Square-a I&PR Department sak mek Lianchhiari Rûn, Mualpuia Govt. Aizawl College New Campus leh MINECO-a High Court sak mekte a tlawh a. Chief Secretary hi Planning & Programme Implementation Secretary Lalmalsawma Pachuau-in a tawiawm a ni.
    Chief Secretary chuan heng project sak mekte hi enin, contractor-te chu hnathawh dan tlangpui leh an sak zawh hun tur te a zawt a. Heng building a awm tur thilte chu chipchiar taka zawtin chungte chu building sak zawh hma ngeia ruahman a dahfel ngei turin a hrilh a. Lianchhiari Rûn a tlawhnaah hian Lallianpuii, Director, I&PR Department chuan helai hmun hi sawrkar tan hmun tangkai tak a nih dan turte Chief Secretary hi a hrilh a ni.