Aizawl June 16, 2023 : Chin Association of Maryland chuan thuchhuah siamin June 27, 2023 khian Open Society Foundation, Washington DC hmunah thutkhawm an nei dawn a, he hunah hian Mizoram-a Chin refugee te chungchang, raltlan te tanpui dan tur leh Mizoram tualchhung mi ten an lo mikhual dan te an sawiho dawn a, US State Department hnenah sawiho tur hi report an pe.

CAM hian Mizorama an zin report hi US State Department-ah an thehlut a, hetiang hian report an pe. March 10-23, 2023 khan CAM Board Chairman Reverend Tim Siemens, Advisor Matthew Wilch leh Executive Director Zo Tum Hmung te chu New Delhi leh India state pakhat Mizoram-a Burma atanga Chin leh refugee dang te dinhmun an rawn zirchiang a ni. Heng raltlante hian chhawmdawlna an mamawh zia an report-ah an tarlang a ni.

Matthew Wilch chuan, "Kan thil hmuhchhuah chu Mizoram State sawrkar, NGO leh Kohhran ten Burma atanga Chin refugee te hi tha takin an lo dawngsawng a ni," a ti, Cam Advisor chuan a report-ah hian, "Refugee te hi tualchhung mi te hian lo dawngsang tha hle mah se, khawvel hmun dang atangin tanpuina an mamawh tak zet a ni," tiin a tarlang bawk.

"Refugees te hian venhimna leh tanpuina an mamawh. Mizoram-a UN agencies awm, UNHCR, UNICEF, WPF leh UN agencies dang te pawh hian hma an lak a ngai a ni, " CAM Executive Director Zo Tum Hmung chuan a ti. "A lehlamah chuan, Burama tualchhung Chin State atanga a thenawm Sagaing leh Magway region-a awmhmun an sawnsak te leh India-Burma ramri-a awm te pawh hian venhimna leh tanpuina an mamawh hle a ni," a ti bawk.

Tuna an report pek hi February 1, 2021-a Burma sipai rorelna hnuaia an awm hnua a vawilina a ni a. CAM chuan Open Society Foundation ten he sawiho an thleng tur chu lawmawm an tih thu an sawi bawk.