India-a state paruk vel chu sorkar laipuiin China-a naupanga thawkna lam harsatna natna leng a darh zau zel turah inralring tura a tih angin an inbuatsaih.

Rajasthan, Karnataka, Gujarat, Uttarakhand, Haryana leh Tamil Nadu sorkarte hi an damdawi in leh thawktute chu thawk lam harsatna vei an awm palha che nghal thei tura inring tura tih an ni.

Karnataka health department chuan tlang hri leng lakah mipuite fimkhur turin an ti bawk a. Hri leng kaite awm dante tichhuakin tih tur leh tih loh tur te an tichhuak bawk.

Heng zingah hian khuh leh hahchhiau laia ka leh hnar hup te, kut sil fai uluk te, hmai khawih tam loh leh mi zinga awmin hmai tuam te a tel.

Rajasthan health department-in inkaihhruaina a tihchhuahah chuan ‘tun dinhmunah chuan lungngaih viahna tur a awm lo’ tih an tar lan rualin thawktute chu inringa hri a darh lohna tura inpeih turin an ti.

Naupang lam enkawlna bik leh medicine department-te chu inbuatsaih uluk lehzual turin a ti.

Gujarat Health Minister Rushikesh Patel chuan China-a thil thleng avang hian COVID-19 len laia an hmanraw neihte chu an tichangtlung lehzual tih a sawi a. State sorkar hian thuneitute chu inbuatsaihna enpui reng turin a ti bawk.

Uttarakhand sorkar pawhin damdawi in thuneitute hnenah thawk lam harsatna awmte thlithli uluk turin a ti a. Uttarakhand-ah hian district pathum - Chamoli, Uttarkashi leh Pithoragarh te chu China nen an inri.

Haryana health department chuan mi mal emaw, sorkar damdawi in emaw, a hlawm deuhva thawk lama harsatna nei awm tam deuh an awm chuan a rang thei ang bera inhriattir turin a ti.

Tamil Nadu-ah chuan sorkar leh mi mal damdawi in zawng zawngte hnenah health department-in inralring tura hriattirna a tichhuak.

Health department-in thu a chhuahah chuan tun thleng chuan an state-ah naupang pneumonia an la awm lo tih an sawi a; mahse, thuneituten an thlithlai a, an inralring reng tih an tar lang.

Union health ministry chuan state thenkhat hnenah hian thil inlumlet mek avangin rawtna a thlen hlawm a. Ralkhelh chiamna tur a la ni loh rualin thlithlai uluk erawh a ngai tih a sawi.

“State leh Union Territory zawng zawngte chu kumin kum tira tihchhuah tawh ‘Operational Guidelines for Revised Surveillance Strategy in the context of COVID-19’ hmang vek tura tih an ni a, khatah khan influenza-like illness (ILI) leh severe acute respiratory illness (SARI) kaihhnawiha hma lak dan tur tar lan a ni,” tiin thu a chhuah.

Covid-19 a irh chhuah atanga kum li hnuah China hmar lamah hian thawk lama harsatna nei an pung hle a, a bikin naupangah a tam zual.

Chinese damdawi in thuneitute chuan heti taka he natna kai an tam chhan hi an lo hriat tawh sa virus leh an rama thlasik a innan fuh vang niin an sawi. An ramah hian December khan Covid inkhuahkhirhna chu an lo hlip tawh.

Mi thiamte chuan an sawi hi pawmawm a ni reng em an hre lo va, hri chi tharin a thlen a ni thei zawk tih an sawi.