China-in kum 13 liam ta chhunga lirnghing thihpui an tam ber tum tawngin an ram hmarthlang lam a sawiah mi 118 thi an awm tawh.

Magnitude 6.2-a na lirnghing hian tlangram, Gansu province chu Thawhtanni zanlai vel (India-a zan dar 9:30) velah sawiin an thenawm, Qinghai pawh a sawi tel.

Khaw vawt tak vur tlak lai a ni a, thi hi an pun zel rin a ni.

Chinese President Xi Jinping chuan an rama rethei leh kilkhawr lai berah hian rescue crew sang rual a tir lut lut nghal.

Thawhlehnia sorkar TV leh social media-a thlalak leh video darhah chuan khaw thenkhat chu a puma inthen phawk te, building lian tak tak leh in chim hmuh tur a tam hle.

An chenna in tlan chhuahsantute chu khawlaiah awmna tur sain an khawsa zui mek a, evacuation camp siam a ni bawk a. Hetih lai hian Chinese chanchinbute chuan Thawhlehni khan khaw vawh lam hi -13°C niin an tar lang.

Dam chhuak thenkhat chuan lirnghing hian ‘tui fawn so bulh bulhin a len ang mai’ niin an inngai tih an sawi a, rang takin an chenna in an tlan chhuahsan hlawm tih an insawi.

“Ka chhungte ka kai tho va, chhawng 16-na atangin lei lamah kan tlan chhuak nghal a ni,” tiin mi pakhat, Qin chuan a sawi.

Gansu province-a a tuar na ber, Jishishan county tual chhung thuneitute chuan building 5,000 chuang a chhia niin an sawi.

Chinese chanchinbute chuan Gansu rescue team director thu sawi chhuah chhawngin khaw tam taka chenna in chhe tak takte chu a chhe nasa hle a, an inte hi a upa tawhin tam tak chu hluma sak an ni hlawm.

Gansu hi Tibetan leh Loess tlang chung zawl inkar, Mongolia nena an inrina bula awm a ni a. China-ah chuan a rethei ber leh chibil chenna a ni.

Lirnghing intanna hi Linxia Hui Autonomous Prefecture a ni a, heng lai hi Chinese Muslim tamna an ni a, Hui, Bonan, Dongxiang leh Salar mite an cheng bawk.

Chinese thuneitute chuan lirnghing hi Richter scale-ah 6.2 an tih laiin US Geological Survey (USGS) chuan magnitude 5.9-a na, lei hnuai km 10-a thuk atanga intan niin an sawi a. A hnuah nghing nawn vawi 10 chuang a thleng tawh niin tual chhung thuneitute chuan an sawi.

Thawhlehniah khan Gansu thlanga Xinjiang province-ah pawh magnitude 5.5-a nain a sawi a; mahse, thi an awm hriat a ni rih lo.

Heng lai vel zawng zawngah hian power leh tui lakna a chhia a, hei hian chhanchhuah hna thawh pawh a tibuaithlak zual.

Thuneitute chuan khaw vawt lutuk hnuaiah hian dama mi chhanchhuak turin hun an nei tlem niin an sawi.

President Xi chuan ‘mi zawn leh chhanchhuah, hliam enkawlah theihtawp an chhuah dawn’ tih a sawi a, thi a tlem thei ang ber an awm theih nan hma an la tih a sawi bawk.

China hi tectonic plate hrang hrang - Eurasian, Indian leh Pacific plate intawh khawmna niin lirnghing a tam duhna lai a ni.

September thla khan chhimthlang lama Sichuan province chu magnitude 6.6-a nain a sawi a, mi 60 chuang an thi.

Kum 2010-a Yushu, Qinghai province-a nghinga mi 2,700 zet an thih hnuah Gansu lirnghing hi China-a thi an tam leh ber tum a ni.