US House of Representatives speaker Nancy Pelosi chuan nimin khan Taiwan a tlawh a, hetih lai hian China chuan a lo sawi lawk tawh angin Taiwan leh a chheh velah hian military drill a kalpui ve nghal. He  military exercise hi China-in a kalpui tawhah chuan a lian ber tih tarlan a ni. 

China chuan Nancy Pelosi-i'n Taiwan a tlawh hi a duh lo hle a, vauna thu pawh a chhakchhuak nasa hle. A lo sawi lawk tawh ang ngeiin US chetdan duh lohna leh Taiwan chu a thuhnuia awm a ni tih lan tir nan military exercise hi a kalpui a ni. Military exercise an neihna hi Taiwan atanga mel 12 vel leka hla a ni a, Taiwan chuan China hi status quo tihdanglam tumah a puh. 

Beijing chuan exercise hi tuipui lian tak takah neih tur a ni a, long-range live ammunition pawh a tel dawn  a ni, a ti. Hei hi Taiwan chuan tui leh khawmuala inhrek tumnaah a ngai tih a sawi a, analyst Bonnie Lin pawhin Taiwanese military te chuan fimkhur taka an chhanlet tur thu BBC a hrilh. 

Hetianga boruak a sosan lai mek hian Taiwan chan an minister eng emaw zat chuan cyber-attack an tawk tih a sawi. Taiwan hian an lawngte chu kawng hrang hrang zawh turin a ngen bawk a, Japan leh Philippines te nen pawh inbiakna an nei tawh a, thlawhtheihna kalna kawng dang an dap bawk. 

Japan pawhin China hian a military drill kalpuina hi exclusive economic zone (EEZ) pel a nih thu a sawi a, hetih lai hian China sawrkar thupuangtu Hua Chunying chuan Japan thusawi hi Beijing a pawm lo tih a sawi.