August 16, 2022; Chief minister bial (Aizawl East-I) chhung a awm, Zemabawk Local Council chu member thenkhatin an awmna party an chhuahsan avanga sawrkarna siam thei an awm tak loh avangin vawiin atangin thiah (dissolved) a ni.

Municipal Commissioner, Zothanmawian vawiin ah 'Notification' tichhuakin, sub-rule (1) of Rule 24 of the Mizoram Municipalities (Ward Committee and Local Council, Rules, 2010 (as amended in 2020) sawi angin, Zemabawk LC chu notification chhuah ni atangin thiah (dissolved) a ni a, hei hian Zemabawk LC thar siam tura inthlanna neih a nih hma a huam ang.

Zemabawk LC thiah a lo nih tak avangin LC chairman seal leh document pawimawhte chu 19.8.2022 ral hmain AMC ah thehlut vek turin a hriattir bawk.

Notification a tarlan a nih danin, Zemabawk LC member thenkhatin an awmna party an chhuahsan avanga sawrkarna siam thei an awm tawh loh thu Zemabawk LC secretary hnen atangin ziaka dawn a ni a, thil awm dan chhui chian a nih hnuah LC secretary thu thlen chu thil dik a ni tih fianfiah a ni. Dan in a sawi angin, tuna LC secretary ni lai Kalvari Tlangmawia chu, a aiawhtu tur midang ruat a nih hma, secretary mawhphurhna chelh zui tura tih a ni.

Zemabawk LC member 7 awmna ah kum 2020 inthlan ah MNF in seat 5 an la a, an zinga pakhat chu AMC inthlan ah a tlin avangin, kum 2021 kumtawp lam ah bye election neih a ni. Chutah chuan ZPM ticket a ding a tling. Tunhnai khan MNF LC member pakhat leh congress LC member pakhatin an party a chhuahsan a, hemi vang hian tun a Zemabawk LC dinhmun chu; MNF 3, INC 1, ZPM 1 an ni a, an party chhuahsan LC member 2 an la awm bawk.