ZALEN, Mar. 28, 2025: Minister hlui, AIACC National Executive member Zodintluanga Ralte chuan FLAM inkhawmpuiah Mizoram Chief Minister Lalduhoma chuan sorkar kal tawhte fakna aw a chhuah ve ta niin a sawi.

Social media platform X-ah post siamin Zodintluanga chuan, “Kum 41 zet politics buzawla min telpui hnuah kan CM chuan sorkar hmasate engmah thawk lo chhe lailet der nia a ngaihdan chu a thlak ve ta,” tiin post a siam a ni. 

ZPM party hian inthlan dawna an auhlaah kalphung thar tih an hmang a, Mizorama sorkarna lo chang tawhte chu state tana hna thawk mumal vak loah an puh a, social media lamah phei chuan hetianga sorkar kal tawhte an puhna hi a thawm pawh a ring hle a ni.

Zodintluanga chuan chief minister chuan ngaihdan a thlak ta nia a sawi chu nemnghetin X-a a post siamah hian, “FLAM inkhawmpuiah Mizoram chu ‘state hmasawn chak ber pawl’ a ti a, ‘MLA lo ni tawh thinte thawhrim rah a ni’ tiin a sawi,” tiin Zodintluanga chuan X-ah hian a ziak a ni.