Aizawl : Chief Minister Lalduhoma chuan Industry neitute chu Mizorama hmalakna kalpui turin a sawm.

Merchant's Chamber of Commerce & Industry (MCCI) te chuan Zirtawpni khan Kolkata-a an Conference Hall-ah Chief Minister Lalduhoma chawimawina leh amah kawmna hun an buatsaih a. He hunah hian Chief Minister chuan MCCI ten chawimawina an hlan avangin lawmthu a sawi a. "Phu lo inti hle mahila hna tha thawk tura kohna aw anga ngaiin in mi chawimawina hi ka dawng a ni," a ti.

Lalduhoma chuan a kaihhruai sawrkarin kalphung thar policy a neih thu te, eirukna tel lova sawrkarna kalpui an tum dan te, ni 100 chunga hmalakna tur an duan thute leh a kaihhruai sawrkarin ruahmanna a neih tlangpui te a hrilh a. "Mizoram hi amah maia dingchhuak thei a ni bik lova, sawrkar laipui leh mimal enkawl industry hmun hrang hrang a mite nena awmze neia hmalak hona a mamawh a ni," tiin MCCI member kalkhawm te hnenah hian hmalak theihna tur huang langsar zual te sawi langin, thawhhopui ah a sawm a ni. Hma an la duh a nih chuan engtiklai pawhin amah emaw an hmalakna tur kaihhnawih Minister leh department thuneitute emaw state pawna Mizoram House te chu an biakpawh reng theih thu a hrilh a. Chutihlaiin sawrkar policy leh scheme thenkhat hmanga sum zawn nan maia Mizoram rawn hman tumte tan erawh chuan hmun a awm loh thu a hrilh nghal a ni.

MCCI member kal khawmte hian Hotel lamah te, Steel lamah te, Oil leh Animal Feed te bakah Entreprenuership lama Mizorama hma la duh an awm thu Chief Minister hi an hrilh a ni.