Aizawl February 10, 2024 : Chief Minister Lalduhoma chuan vawiin khan Union Minister of State Finance Dr. Bhagwad Karad chu a chenna inah a kawm a, Mizoram chu special category state a la dah chhunzawm zel turin a ngen.

Chief Minister hian central sawrkarin Interim Budget atanga a lan dana SASCI atan sum tam zawk ruahman a tum chu lawmawm a tih thu a hrilh a. Mizoram tana a kalpui dan awlsam zawk (special dispensation) awm thei se a duh thu a thlen a. Mizoram Rural Bank chu Mizorama bank inzarpharh zau ber leh mipuite pawhin an chhawr nasat a ni a, an CD Ratio pawh a tha thin hle a. Chuvang chuan thawktute allowances hi a sponsor bank, SBI-a thawktute allowances zat pek ve ni se tha a tih thu a thlen a. Mizorama bank awmte, a bikin Regional Rural Bank ten thawktu indaihlohna a tawrh nasat avangin Mizoram tan emaw India hmarchhak puala thawktu tur lak runpui, special recruitment kalpui turin a ngen a ni.

Chief Minister hian Mizoramah private bank te an pung zel chungin private bank te hi thingtlang lamah an inzarpharh zau tawk lova chuvang chuan mipuiten an lo chhawr tangkai tawk lo, tiin zau zawka an inzarpharh theih nana hma laksak turin a ngen a. Private bank awmsa te hian anmahni (local branch) in sanctioning power an neih loh hlawm avangin hna an thawk chak theih lova, loan diltuten harsatna an tawk thin a. Mahnia sanctioning power neia an awm theih nan private bank thuneitu sangte lo ngen sak turin a ngen bawk a ni. Tin, bank thenkhat ten an hnena loan diltute Income Tax Returns an lo phut thin a. Mizoram chu Income Tax pek lohna state a nih angin bank te pawhin lo phut tawh lo thei se a duh thu leh hma lo laksak turin a ngen a ni.

Mizorama bank tam zawkten Credit Deposit Ratio an nei hniam hlawm hle a, mahni target tlin thei lo an tam hle tih hrilhin, mipuite pawisa tling khawm hi mipuite tan veka CD Ratio tha zawk an beisei tlat tih hrilhin Union Minister hmalakpuina hi a ngen a. Mizoram sawrkar pawhin bank ten an hnena loan diltute an rin ngam a, uar lehzuala loan an pek theih nan party mi leh sa duhsak tura ngenna emaw beneficiary atana lo thlan bik ang chi te an kalpui ve loh tur thu a hrilh a ni. Heng te bakah hian Mizoram Development Bank din theih dan tur te pawh a sawipui a ni.

Dr. Bhagwad Karad hian Chief Minister thil thlen te chu an pawimawh hlawm hle tih sawiin, Chief Minister awm lai ngei hian a kaihhnawih official pawimawh te telna tur meeting tun thla ni 16 a nei tura kohna a tichhuak nghal a ni.