Aizawl January 5, 2023: Vawiin khan Chief Minister Lalduhoma chuan Kolkatta a British Deputy High Commissioner, In charge of East India, Dr. Andrew Flemming chu a office ah a tlawh a. Inkawmna hun tha tak an nei a, an thil sawi te hi ziaka dah a, bawhzui an remti. Dy. High Commissioner hian hun remchang hmasa berah Mizorama rawn zin a tum thu a lo hrilh bawk.

Dr. Andrew Flemming hian Mizoram Chief Minister zinga British High Commissioner tlawh hmasa ber a nih thu lo hrilhin lawmthu a sawi a. A kaihhruai sawrkar kal zelna turah duhsakna hlanin, an theihna zawn apiangah an thawhpui dawn tih a lo hrilh a ni. Chief Minister hian British Missionary chungchang leh a la damte hming te sawi langin, anmahni avanga Mizoten hmasawnna nasa tak kan hmuh thu a hrilh a, lawmthu a sawi a ni.

An inkawmnaah hian Refugee chungchang an sawi a, theih ang anga British High Commission (BHC) lamin NGO kaltlanga a puih thin avangin Chief Minister hian lawmthu a sawi a. Mau hmanga Bioethanol siamna tur Project tan nghal thuai dan tur te sawiin; Hydro Electric Power leh kawngpui tha nei tura thawhho dan turte, Britain-a Mizo nurse tam zawk thawn luh dan tur te, Mizo thalai British army lama tam zawk an luh theih dan tur kawng te pawh an sawi dun bawk. An thil sawi te hi ziaka dah a, bawhzui an remti a ni.