June 19, 2023; Congress party chuan thuchhuah siamin, rapthlak tak leh rawva taka Zohnahthlak te chunga an chet hnua, hetia phone call hmang maia inbiakna kalpui a ni leh, Manipur Chief Minister ngenna ang ang lo pawmpui duak duak hi Mizoram tan him lovah Congress Party chuan a ngai tih an tarlang.

Thuchhuah an siamah congress party chuan sawrkar thuchhuah danin June ni 18, 2023 (Pathianni) chhun khan Chief Minister Pu Zoramthanga leh Manipur Chief Minister N. Biren Singh te phone hmanga inbia tih tarlangin, "May ni 3 atanga Meitei ten Manipura kan Zohnahthlakte chunga buaina nasa tak an siam tirh lam khan Manipur Chief Minister N.Biren Singh hian Mizoram Chief Minister Pu Zoramthanga pawh be duh loin, a phone call pawh a chhang duh lo hial tawh," an ti.

"Rapthlak tak leh rawva taka Zohnahthlak te chunga an chet hnua hetia phone call hmang maia inbiakna kalpui a ni leh Manipur Chief Minister ngenna ang ang lo pawmpui duak duak hi Mizoram tan him lovah Congress Party chuan a ngai a. Chief Minister Pu Zoramthanga hi Mizoram leh Mizo hnam zahawmna humhim tura Manipur Chief Minister Biren Singh-a bawl kual vel mai maia awm lo turin kan ngen a ni," an ti bawk.