European Union hnuaia damdawi lam viltute chuan Pfizer-BioNTech coronavirus vaccine chu naupang kum 12 leh 15 inkarte tana hman theih turin a pawm ta a, naupangte tana tuna hri leng mek laka invenna hmasa ber a ni.

Amsterdam-a hmunpui nei, European Medicines Agency chuan he damdawi hi naupang thanglaite tan hlauhawmna a awm lo va, hlet tha lo (side effect) lian pawh a nei lo niin Zirtawpni khan an sawi.

“Hripui leng hmachhawn leh beih meknaah naupang zawkte hnena him leh awmze nei invenna pek tur awm hi hmasawnna pawimawh tak a ni,” tiin EMA hnuaia damdawi in hriselna a khawih theih dan leh invenna lam buaipuitu hotu, Marco Cavaleri chuan a sawi.

United States leh Canada pawhin Pfizer hi thanglaite tana rinngam a ni tih an lo pawm tawh bawk.

EMA chuan Comirnaty tia a hming an vuah damdawi hi kum 12 leh 15 inkarte tan chawlhkar thum danah tal vawi (dose) hnih lak a ngai tih an sawi.

Tunah chuan EU ramte hian tleirawlte hnena an pek hun tur chu an kuta awm a nih tak thu a sawi bawk.

EMA-in thutlukna a siam hma, Ningani khan Germany chuan kum 12 chin tan June 7-a pek tan an tum thu a lo sawi tawh a. Italy pawhin kum 12 chung lamten an lak duh nan campaign huang zauh an tum mek bawk.

Naupang leh thalaite hnena invenna pek hi vantlanga hri kai lo tur khawpa chakna a awm theih nan leh hripui tihziaawmna tha bera ngaih a ni a. Japan pawhin Zirtawpni khan Comirnaty khan kum 12 chin hnena pek a tum ve thu a lo puang tawh.

Thalaite hi tuna Covid-19 leng mek hian a bei na lo va, a kaite pawh natna lang chhuak lo leh inhre lovin an dam leh mai thin a. Hei hi mi dang an kai darh tam phah hle thung.

Pfizer leh BioNTech hian March atang khan naupang 2,260 hnenah damdawi hi an enchhin tan a, 100%-in hri darh tur a veng thei niin an sawi.

Vaccine siamtu dangte pawhin naupangte hman tur hi an buaipui tawh chinah a tha lam zel result an nei tih an sawi a. Kar tir lamah khan Moderna Inc naupang kum 12-te hnena an enchhin chu a hlawhtling tih sawiin, emergency-a hman phalsak turin US Food & Drug Administration hnenah  thla tharah dilna thlen an tum.