Congress ‘G-23’ tia an sawi mai, an party chhunga insiam thara insiksawi duh hruaitu mi 23-te chuan an party tihphel lam chu an rilru-ah a awm lo tih an sawi a. Hetih rual hian Gandhi chhungkua chu India rama political party upa ber a thawh leh theih nana dawr nawn leha insiksawi chungchang sawipui leh an tum.

Congress hruaitu hlun, Ghulam Nabi Azad-a ina thukhawmte hian tun dinhmuna an party phel tur chuan ‘an chak lo lutuk’ niin an sawi.

Heng mi 23-te hi kum hnih kal taa an party siam thata hruaitu pawh insiksawi an ngai a ni tia party chief Sonia Gandhi-i hnena lehkha ziaka thlentute kha an ni.

An hotu ber chan chang, Azad-a chuan an ina an thutkhawma an thil sawite chu Gandhi-i a sawipui leh dawn nia sawi a ni a. Hetah hian Rahul Gandhi leh Priyanka Gandhi Vadra te pawh tel tura beisei an ni.

G-23 member-te hi an party-a thutlukna siam thei sang ber, Congress Working Committee (CWC)-in tun hnai inthlana an chet chhiat em em chungchang sawihova Pathiannia an thutkhawm tuk lawka inhmukhawm an ni.

Gandhi-i hian CWC thutkhawmah hian bân a tum tih a sawi a, a fate pahnih, Rahul leh Priyanka te nen, an chhungkua chuan chawlha party tana an nihna kalsan an inhuam tih a sawi nia sawi a ni a; mahse, hnawlsak an nih thu an thutkhawm zawhah Congress hruaitu hlunte chuan an sawi.

CWC hian state panga inthlana an dinhmun sawihonaah hian che chhe hle mah se Gandhi-i kaihhruaina chu an la ringtawk tih an sawi a, an that zawkna tura insiksawi dan dap turin an ti bawk.

Pathiannia an thutkhawm tukah hian Gandhi-i hian assembly inthlanna state pangaa an party chief theuh - Jairam Ramesh, Ajay Maken, Avinash Pandey leh Jitendra Singh chu an nihna atangin a bân zui.

G-23 hruaitute hian Congress-a Gandhi chhungkaw tana rinawm tlatte chu party tana thawhhlawk lo lo, an hruaitu lawkte hum tlat thung si niin an sawi.

Heng mite hi an nihna chelh pawh paihsak vek an duh a, chuti a nih loh chuan chhiat mek laiin chhiat lehzualnaah an tla lut thei dawn niin an ngai tih an sawi.

G-23 thutkhawmnaah hian a tira Gandhi-i lehkha thawntute bakah mi thar pawh an tel belh a, mi thar zinga langsar ber chu Gandhi chhungkaw lama tang reng thin, Mani Shankar Aiyar-a a ni.

Lehkha thawntu zinga tel, tun hnaia ngawih chuh thei tak ni ta thung, Shashi Tharoor-a pawh Azad-a ina thutkhawmnaah hian a tel bawk. 

An thutkhawm zawha thuchhuah an siamah G-23 member-te hian ‘a huhovin, hruaitute zawng zawng pawh telin thutlukna siam’ an duh thu an sawi.

An thuchhuahah hian Gandhi chhungkaw kaihhruaina hnuai ni lova awm lam chu an sawi lang lo va. “Congress-in hma lam kan pan zel theihna tur chu a huhovin, kan hruaitute zawng zawng pawh telin, level hrang hranga thutlukna siam thei chinte huap veka inrawn leh insiksawi a ngai a ni,” an ti.

Azad-a ina inhmukhawm zingah hian Kapil Sibal, Manish Tiwari, Anand Sharma leh Prithviraj Chavan te pawh an tel a. Gandhi-i lehkha thawntu ni lo, mi thar zingah Bhupinder Singh Hooda, Raj Babbar leh Shankar Sinh Vaghela te pawh an tel.

Thutkhawm hi a tirah chuan Kapil Sibal-a inah an ko va; mahse, hruaitu thenkhat tan a remchan loh avangin chawpchilh takin a hmun hi sawn a ni.