Aizawl August 12, 2024 : MPCC Treasurer Lalmalsawma Nghaka chuan tunhnaia Agriculture Minister leh Adviser to CM ten thlai thar lei dan tur chungchanga an thuchhuah an siam atanga khan Sawhthing bik lei leh hralh chungchanga hmalak an tumdan thenkhat kha sawhthing chingtute tan him lo leh an hahthlawnna tur ni theia an hriat avangin tha a tih loh thu a sawi.

Congress chuan hmalak an tum dan hi Sawhthing chingtute tithlawn tu leh ti beidawngtu an ni thei an ti a, Sawhthing Grade A leh B a then an tum a, 'Grade A' chauh hi ₹50 leh a chunglama lei tur an ti a, Grade B chu a chingtute leh a leitu te inbiakremna tura an dah hi tha lo an ti. Mizoram-ah Sawhthing hi grade a then a ni ngai lova, an then anih chuan Grade then dan tur, a quality eng chen nge tih inkaihhruaina a awm loh bakah a leitu ten 'Grade B' anga sawhthing quality an then teuh chuan a chingtute a tuartu an ni dawn an ti.

Khawpui mi sawhthing chingtute ta an leisak dawn lo an ti hi thil tha lo tak a ni. Khua leh tui tu pawhin sawhthing a ching a, a chinna khua-a society ah a in register anih chuan an leisak ngei tur a ni. An Manifesto angin society a in register te sawhthing leisak hi an ba a, chutih rualin khawpui mi pawh nise an sawhthing chinna khua a society ah sawhthing a chin anga in register hi an phalsak ngei tur a ni an ti.

Congress chuan Sawhthing leina tur, Minimum Support Price (MSP) pekna tur hi a hranpa in Budget ah a awm lova, Banakaih policy hnuaiah vaibelchhe 200 dah a ni a, nikuma thlai thar leina vaibelchhe 110 an dah, an la hman loh nen vaibelchhe 310 awm anga ngaih theih a ni. Sawhthing hi sawrkar chhut danin quintal nuaih 10 vel Mizorama thar tura ngaih a ni a, Sawhthing thar tur sawrkarin a chhutchhuah zat ngaihtuahin a beitham hle an ti.

Congress chuan thlai dang lei tura an intiam Hmunphiah, Aieng leh Hnarcha chungchanga hmalakna te hi an la hre tlem a, heng thlai chingtute pawh hi ngaihven a, leisak ngei turin emaw, Minimum Support Price inthlan hma a an intiam ang ngeia ti ngei turin an phut tlat a ni.