All India Congress Committee (AICC) central election authority chairman Madhusudan Mistry chuan Inrinni khan Jharkhand minister hlui, KN Tripathi-a’n Congress president chuh tuma hming a pek chu hnawl a nih thu a puang a, chuhtu pahnih chauh an awm dawn ta.

Mistry chuan Tripathi-a rawttu (proposer) zinga pakhat chu a hming ziak nen a inmil lo va, proposer dang pakhat hming sign chu a nawn bawk tia sawiin inthlan chuh tura hming pekna chu hnawl a ni ta tih a sawi a. Mallikarjun Kharge leh Shashi Tharoor chauh an ni dawn ta a ni.

Tripathi, Kharge leh Tharoor hian Zirtawpnia hming pek theih ni hnuhnung berah khan party chief thlan tur atan an hming an pe hlawm.

New Delhi-a Congress headquarters-a thuthar lakhawmtute a kawmnaah Mistry chuan hming pekna form 20 an dawn thu leh heng zinga pali chu hnawl a nih thu a sawi a. Kharge-a hian form 14 a thehlut a, Tharoor-a’n panga leh Tripathi-a’n pakhat a ni.

“Form 20 thehluh a ni a, heng zing atang hian endiktu, scrutiny committee chuan pali chu hming sign kaihhnawih avangin hnawl a ni a. October 8 thleng inhnukdawk leh duh tan hun hawn a ni a, chumi hnuah thil a chiang lehzual dawn a. Tumah inhnukdawk an awm lo a nih chuan vote thlak tura inbuatsaih a ni ang,” tiin Mistry chuan a sawi.

Congress president inthlan turah hian chuh tura hming pe lut, inhnukdawk leh duh tan October 8 thleng hun hawn a ni a, vote hi October 17-ah thlakin October 19-a result puan a ni ang.

Tun tuma inthlan turah hian Gandhi chhungkaw hming a lang lo va, kum 20 chuang hnua anni chhungkaw inlan miah lova an inthlan leh hmasak ber tum a ni dawn a ni.

Rahul Gandhi chu state tam taka an party unit chuan president tura an duh thu sawi hlawm mah se tumahin an hmin zo ta lo va, inthlan pawh a chuh dawn ta lo.

Tuna an party chief nihna chelh mektu, Sonia Gandhi chuan chuh a tum lo va, ani hi tun hmaa lo ni tawh niin a fapa hnenah mawhphurhna a hlan tawh a, a fapain kum 2019 Lok Sabha inthlanpuia an chet chhiat hle hnua a bânsan leh takah khan a lailawka president tura tih nawn leh niin tun thlengin a la hruai ta a ni.

Congress hruaitu, Kharge-a chuan Inrinni khan Rajya Sabha-a opposition leader a nihna atanga a banna a thehlut.

Party president inthlan lo awm tura a chuh dawn avangin a nihna chelh lai chu a kalsan a ngai a, hei hi Udaipur-a party intawhkhawma thutlukna an lo siam tawh, ‘Hruaitu pakhatin chanvo pakhat’ tih an lo kalpui vang a ni.

“All India Congress Committee president inthlan turah hming ka pek luh ve tak avangin Rajya Sabha-a opposition leader ka nihna chu ka bânsan e,” tiin Kharge hian an party president nihna chelh lailawktu, Sonia Gandhi-i hnenah lehkha a thehlut a ni.

Kharge-a hi February, 2021-a Ghulam Nabi Azad-a a chawlh hnuah khan ram rorelna in sang zawkah hian opposition leader a ni tan a. A chawlh takah hian P Chidambaram, Mukul Wasnik, Ranjeet Ranjan leh Digvijaya Singh te chu amah thlaktu tura rin kai zinga mi an ni nghal.

Kharge-a hian Congress president thlan tur atan hian Tharoor leh Tripathi te nen hming pein Tripathi hi hnawl a ni a. Karnataka hruaitu leh Tharoor an inkhing dawn ta a ni.

G-23 hruaitu an tih, kum hnih liam taa an party chhungah insiam thatna kalpui a ngai tiin party chief hnena lehkha thawntu zinga mi a ni.

Party chief thlan turah hian Rajasthan Chief Minister Ashok Gehlot chu Gandhi chhungkuain an duh ber a ni a; mahse, an state-a ro a relnaah amah thlawptu MLA-ten an sorkarna tiderthawng thei hiala hma an lak avangin lawm a hlawh zui lo va, chuh pawh a chuh dawn ta lo a ni.

Madhya Pradesh chief minister hlui, Digvijaya Singh pawh chuhtu tura sawi rik a ni a; mahse, ani pawh tlaikhawhnua Kharge-a’n chuh a tum dawn tak avangin a kal kiang leh a ni.

Kharge-a khingpui tur, Tharoor-a hi an hruaitu hlun, G-23 an tih zinga mi ve tho a ni a. Ani hi chuh tuma thil tichiang hmasa bertu a ni.

Mi thiam a ni a, India ram tana palai hna pawh lo thawk nasa tawh a ni a, politics-a a inhman hnuah pawh sulhnu tam tak nei tawhin union minister pawh a lo ni tawh thin a ni.