Aizawl January 10, 2023: MPCC President Lalsawta chuan central-ah Congress sawrkar lo mah se, 2023-ah Mizoram-ah an sawrkar dawn tih a sawi a, an sawrkar chuan power siamchhuah belh tura hmalak leh thenawm ram te nena insumdawn tawnna te chu ngaihpawimawh a nih tur thu a sawi a, corruption an do tur thu leh Congress sawrkarah chuan tumah an corrupt loh tur thu a sawi bawk. 

Vawiina 2023 atana Congress Bhavan hawnnaah MPCC President Lalsawta chuan, “Congress Party hi miin an hrechiang lo thin a, Central a an sawrkar loh chuan Mizoramah an sawrkar dawn lo an ti thin. Mahse, Central a Congress a sawrkar loh avang maiin Mizoramah Congress tan a sawrkar theih loh tihna a ni lo. Central lamah sawrkar lo mah ila, kum 2023-ah hian Mizoramah kan sawrkar dawn. Party thenkhatten an sum neih ringin inthlan an zuam a, an chak ngei pawh an inring. Keini erawh chuan II Chronicles 20:12 thu ‘…a tihngaihna reng reng kan hre bawk hek lo. I lam kan lo hawi mai zawk a ni e,’ tih angin Pathian lam kan hawi mai a ni,” a ti.

Sawta chuan, “Ram hmasawn nan power mamawhna a sang tial tial a, chuvangin, Congress kan sawrkar a nih chuan power siamchhuah belhna hi kan ngai pawimawh dawn. Tin, ram thenawmte nen ram dan anga insumdawn tawnna mumal takin kan siam bawk ang. Tun anga smuggling bupui a insiam kher lo hian dan angin ram dangte nen a insumdawn tawn theih. CYMA leh Synod-in Corruption do an puang tawh. Mi tam ber kan telna pawlten an duh ang ngeiin Congress hian Corruption kan do dawn a ni. Congress sawrkarah chuan tumah an corrupt lovang. Mizoram hi mi taima leh thawk rimte dinchhuahna leh hlawhtlinna ramah kan siam dawn,” a ti.

Congress President chuan India ram pum leh Mizoramah Kristiante tan Congress a sawrkar leh a ngai tih sawiin, “India rama sakhaw zalenna nekchepin a awm mek. Chuvangin, Mizoram Kohhrante, Kristian tha tak takte hian sakhaw zalenna a taka kalpuitu Congress party kan sawrkar leh hi an nghakhlel tih i hria ang u. India ram pumah leh Mizoramah kan sawrkar leh a ngai a ni," a ti.

Lalsawta chuan, “Kum a thar angin rilru thar, duh dan thar, nun dan thar nen bul i tan ang u. Mi tling lo leh fam kim lo kan nih kan inhria a, mahse Pathianin, ‘Tih nuam tak leh thuawih taka in awm chuan, in rama thil thate hi in ei ang’ a tih angin tih nuam tak leh thuawih takin i awm phawt mai ang u. DCC, Block, Group leh Unit-te inhuam ila, inpe ila, candidate te ti hautak lo a, an tana phur rit siam lo thei ang ber zawngin chet i tum ang u,” a ti bawk.

Kum 2023 atana Congress Bhavan hawnna leh mi thar lawmluhna hun, Golden Hall, Congress Bhavan-ah neih a ni a. Zodintluanga Ralte, MLA & Treasurer, MPCC-in inkhawm a kaihruai a, Rev. PB Mankima'n Pathian thuchah a sawi bawk a ni.