February 9, 2024 : Vawiin khan Congress Bhavan-ah Friday Political session neih a ni a, MPCC Treasurer Dr. Lalmalsawma Nghaka chuan thu a sawi a, UCC chungchang te, BJP chungchang te, FMR chungchang leh an party dinhmun te a sawi.

Dr. Lalmalsawma chuan BJP sawrkarna apiangah Kristian puite nekchepin an awm zel a, Uttarkhand ah Feb ni 7 2024 khan an Chief Minister Pushkar Singh Dhami chuan Uttarakhand Uniform Civil Code Bill a put luh hnuah pawmin dan a ni ta a ni a ti.

Dr. Mala chuan, "Uttarakhand-ah chuan kan vei em em UCC hman a ni tawh a, keini Mizo Kristiante hi kan inngaihtuah chian a ngai tawh hle. Mizoramah him reng nia kan inhriat laiin zawi zawiin nek hret hret kan nia, chimral kan ni thei dawn. He thil hi Congress chauh ni lovin, MNF leh ZPM te pawh hian ngun takin ngaihtuah rawh se," a ti.

"RSS laimu chu Hindu nationalism, Hindu laimu leh Hindu lal ram din a ni a, RSS hnuaiah Sangah parivar te awmin pawl hrang hrang an awm a, chuta an political wing chu BJP te hi an ni. BJP te Foundational Agenda te zinga lianzual pathum te chu - Ram Mandir Ayodhya a din, Article 370 Abrogation (Nuaibo) leh India Ram a Uniform Civil Code dan siam a ni a. Pahnih an ti hlawhtling tawh a, pakhat hi tihhlawhtling hmabak a ni," a ti.

Dr. Mala chuan, "Sakhaw Zalenna duhtute leh Mizoram mipuite pawh ka ngaihtuahna kan hman uluk chhoh hle a ngai a ni. Congress party hi kum 138 kaltaa din tawh kha niin India ram mipui te nekchepa awma an dikna chanvo humhim tura din a ni a, BJP te dinna nen chuan a in ang lo hle. India ramah hian pawl hnih lianpui kan awm a, pawl khat zawk chuan Hindu lal ram a din theihna an ngaipawimawh hmasa ber a, Hindu sakhaw be lote an nekchep zel a, pawl pakhat zawk chu hnam tenaute tan an ding a, sakhaw zalenna an kalpui thung a, Mizo mipuite hian khawi lam nge kan awn dawn?," tiin zawhna a siam.

Congress Treasurer chuan, "Tunlaiin India leh Burma inkarah daidanna bang siam tum thu a lar hle a. Free Movement Regime min tihtawpsak tawh bawk a, hei hi hmun hrang hrang Zofate zawi awia dan hmanga min daidan tumna a ang riau, daidanna bang avanga thenhran kan nih chuan a hnam pum angin a pawi hle dawn a ni. Nagaland CM chuan ram mipuite min rawn hmasa rawh se a ti a, kan CM hian a ti ve thei dawn em?," a ti bawk.

Sawmna siamin, "Tunah hian Mizoram Congress kan hniam hle a, intuai thar a ngai hle. Mupuiin a thlate a thlak a, van sang taka a thlawk leh angin, Congress party hi Pathianin mipuite rawngbawl tura min hman leh theih nan mipuite tan inpe ral raihin insiam thar leh ang u," a ti.