India rama mipa kum 19 hnuai lamte cricket inelna sang, Cooch Behar Trophy 2023-24-ah Mizoram chuan vawi hnih khelhah an la chak ve ve a, Inrinni khan Manipur chu wicket riata hnehin semifinal luhna hun tha an nei mek.

Gokulbhai Somabhai Patel Stadium, Nadiad, Gujarat-a inkhelah hian Mizoram Under-19 hian an vuak thawh (innings) khatnaah che tha tawk lo mah se innings hnihnaah erawh chesual nawn lovin thenawm rawltharte an hneh.

Manipur Under-19 chuan vaw hmasain run 113 an siamin an thi (out) kim a. Mizoram tan Isaak VL Ngaihzuala, Sihphir chuan over sarih a vawmah run 19 pein mi pali a vawm hlum a. K Vanrotlinga leh Prem Layak ten pahnih ve ve an vawm hlum bawk.

Manipur-in innings khatnaa an run siam an umnaah Mizoram an che tha tawk lo va, run 100 chauh tlin theiin run 33 vaw chhuaktu, F Lalnunkima chu thawhhlawk ber a ni.

Vuak thawh hnihnaah run 13-a hmahruai sa chungin Minipur-in an vaw veleh a; mahse, run 68 chiah siamin Ramhlun Venglai rawlthar, K. Vanrotlinga a che tha a, over 13 a vawmah run 32 pein mi pasarih zet a vawm hlum a, hattrick a siam hial bawk.

Mizoram rawltharten thenawm state rawltharten tum hnih vuaka an run siam belhkhawm chu anmahni lo siam tawh sa nena tanga umin run 82 an siam tlin a ngai a. Thawh khatna angin an chesual nawn duh ta lo va, mi pahnih chauh thiin an umpha a, wicket riatin an chak ta a ni.

Mizoram vuak thawh hnihnaah hian innings hnihnaa Manipur batter pasarih zet vawm hlumtu, captain K. Vanrotlinga chu a tawp thlenga damin ball 20 a hmachhawnah run 29 a vaw chhuak a, Player of the Match-a thlan a ni bawk.

Mizoram hi Cooch Behar Trophy-ah hian Plate Group-ah hmarchhak state dang panga - Arunachal Pradesh, Sikkim, Nagaland, Meghalaya leh Manipur nen an awmho va, inkhel kual vekin a sang paliin semifinal an lut ang a, Mizoram hi khelh nga turah vawi hnih chak tawhin a sang palia tel theihna remchang a nei tha rih viau.

An khelh hmasak berah kar hmasa khan Shillong-ah Meghalaya nen an inkhel chu ruahin a tihbuai avangin an inhnehtawk a; mahse, innings khatnaa run siam tam zawk an nih avangin Mizo rawltharte hian chakin point an hmuh theih zat, point thum an hlawh chhuak tho thung.

Cooch Behar Trophy hi Board of Control for Cricket in India (BCCI) hnuaia kum 19 hnuai lamte tana ni li chhung khelh tournament a ni a, 1945–46 season atang daih tawha khelh tan kha a ni.

A tir lamah chuan sikul inelna atana hman a ni a, 1987–88 atang khan under-19 inelna atan hman a ni.

Inkhel pakhat hi ni li chhunga zawh tura ruahman zel niin Mizoram leh Manipur pawh hi Thawhtanni thleng khelh tura ruahman ni mah se ni hnih chhungin Mizoram hian hnehna an chang hman thung.

Tournament khel hlun leh tha zawkte chu elite group tiin group pangaah team ruk theuhva then an ni a. Mizoram telin, a bak team ruk chu plate group-ah an awm a, inelna hi elite group-a mite nen a hrangin an khel a ni.

Mizoram hian Zirtawpni atang hian Arunachal Pradesh chu Gokulbhai Somabhai Patel Stadium, Nadiad-ah tho an khel leh dawn a ni.