September 5, 2023; PWD junior engineer C Lalfakawma s/o C Thangkhuma (L), Khatla South Chawnga Road chu contractor hnen atanga thamna a lak avanga Court-in thiam loh a chantir chu kum 4 tang turin hrem a ni. 

C Lalfakawma eiruk thubuaiah hian Special Court (Prevention of Corruption Act) judge Dr HTC Lalrinchhana chuan nimin khan thutlukna a siam a, Indian Penal Code Section 409 leh PC Act, 1988 Section 13(2) hnuaiah thiam loh chantir a ni.

Court judgement-a tarlan danin, Mizoram PWD deputy secretary H Thanga Zate chuan May 20, 2020 khan Mizoram Lokayukta-ah thubuai a thehlut a, C Lalfakawma hian PWD Khawzawl Division-a junior engineer hna a thawh laiin Rabung leh Aiduzawl inkar kawng laitu leh enkawl zuitu contractor Lalroenga hnen atangin dik lo takin Rs 17,00,000 a la a, sub-contractor Vanhmingthanga hnen atangin Rs 3,00,000 a la bawk.

Contractor Lalroenga hnenah C Lalfakawma'n Khawzawla a thlen in pa leh thianpa Vanhmingthanga tan sub-contract  hna a dilpuina angin leimin palh thei dâwl nghehna (retaining wall) siam hna pathum a ruahmansak a, Rs 21,00,000 man a ni. A contractor anpui ni lo hnena contract hna pek chhâwn leh, PWD JE-in pawmsak theitu a ni lo chunga a lo pawmsak mai bakah, ruahmansaktu a ni chu Central PWD Manual 2014 clause 33-na kalh a ni.

C Lalfakawma'n PWD JE a nihna anga a thuneihna leh mawhphurhna hmangsualin, uchuak taka sum tam tak hmangin a duhsak zawngte dan loa sub-contract hna a thawhtir avangin IPC Section 409 leh PC Act Section 13(2) hnuaiah thiam loh chantir a ni.

Lalroenga leh Vanhmingthanga te erawh chu court-ah thubuai ngaihtuah a nih laiin sorkar lam tanga inleta, thuhretua an tan avangin thamna sum emaw dawng anga puhnaah finfiah zawh a ni lo.

Special Court chuan, hmasawnna hna thawhnaah sorkar hnathawk engineer-te'n vuaicha tak leh an tih tur an tih loh vanga hna an vil uluk loh avangin mipui sum tam tak awmze nei loa a luan raltir thin thu a tarlang.

Vawiin a Court in hremna a puan ah C. Lalfakawma hi thubuai la nei ngai lo leh chhungkaw chawm tur ber a nih bakah, ama mimal sumpai atana eiruk finfiah a nih loh avangin, kum 2014 kum a siamthat (Amendment siam) a nih angin, section 13 (2) of PC Act, 1988 hnuaia hremna hniam thei ang ber kum li (4) lungin tang tura a chungthu hi rel a ni.