Aizawl: Indian Medical Association, Mizoram State President Dr. Rosangluaia chuan, “India rama hluar thar mek Covid-19 thawh hnihna (second wave) chu Mizoramah a thlen ve loh nan mi tinin tan kan lak a ngai a ni,” a ti.

Zalen-in a kawmnaah Dr. Rosangluaia chuan India ram state laili zawkahte tunlai hian Covid-19 vei hi an pung thar hle tih sawiin, “India ram state

thenkhata a pun vang nge ni tunlai hian Mizoramah pawh Covid-19 vei thar hmuhchhuah hi an pung chho leh ta a, hri hi darh huk thei a nih avangin engtik lai pawha kan inven fimkhur a pawimawh a. Hri kai an tlak hniam avangin kan inthlahdah hret hret a; mahse, khuahkhirhna tha tak hnuaia kan awm reng hi a pawimawh a ni,” a ti.

Covid-19 natna hrik chu a thawk chak lo hret hret nia sawi chungchangah Dr. Rosangluaia chuan, “Natna hri leng reng reng hi a rei chuan a chakna hi a hloh ve tial tial thin a. Mahse, Covid-19 erawh hi chu a dan a dang a, a changin a reh deuh a, a changin a darh leh hluai a, a insiam danglam thei nia ngaih a ni bawk a. Eng ang takin nge a lo lan dawn kan hriat theih loh avangin kan fimkhur hle a ngai a ni,” tiin a sawi.

Covid-19 vaccine la pumhlum tawh mi thenkhatten Covid-19 an vei leh chungchangah Dr. Sangtea chuan, “Covid-19 vaccine hian zaa za (100%) a veng lo a; mahse, vaccine la tawh ah chuan he natna hi kai leh pawh nise an tuar nep a, chu mai bakah thihpui pawh an tlem zawk a, vaccine lak hi lak loh ai chuan a tha zawk hrim hrim a ni,” a ti bawk.