DOWNLOAD OUR APP

Read latest news on your phone
app-store
Covid-19: A zawnin ni nga chhung kai aiin enkawl dam ta
May 15, 2021

Covid-19 hri leng thawh hnihna na taka tuar, India-ah chuan zia lam a pan hret hret niin a lang a. Ni nga chhung chu hri kai hmuh chhuah zat aiin enkawl dam an tam ta.

India-ah hian darkar 24 liam ta chhung khan mi 3,26,098-in hri an kai tih hmuh chhuah a ni a. Hetih chhung vek hian mi 3,53,299 enkawl dam an ni leh hman bawk.

COVID-19 an kai tih hmuh chhuah, enkawl dam leh tawh hi mi vaibelchhe hnih an tling ta a. Tun hnai ni nga chhung chu a zawnin hri kai hmuh chhuah aiin a dam an tam tawh zawk.

India rama hri leng tuar na ber, Maharashtra-ah pawh March 31 hnu lama a vawi khat nan mi 40,000 tling lo, mi 39,923-in hri an kai tih hmuh chhuah a ni a. Khawthlang lam state-ah hian mi nuai 53.09-in an kai tawh a, mi 80,000 dawnin an thihpui tawh thung.

Hetih lai hian an thenawm, Goa-ah chuan ruang halna indaih lohna a nasa mek a. Vaukam state-a inhalna hmun upa ber, Margao khawpuia mi chuan inhalna hmun pali a siam belh a, pathum chu COVID-19 vanga thite tan bika a tih a ni.

Tun hnaia inthlang zo, West Bengal-ah chuan ni khata hri kai hmuh chhuah tam ber ni a tawng ve mawk bawk a, mi 20,846-in an kai tih hmuh chhuah niin mi 10,94,802-in an kai tawh.

Darkar 24 liam ta chhungin mi 136-in thihpui belh lehin mi 12,993 an thi tawh a. An zingah hian doctor hriat hlawh tak tak panga an tel.

India-ah hian COVID-19 kai hmuh chhuah zat tlahniam hret hretin lang mah se damdawi in indaih lohna leh thihna a la tam avangin WHO chief Tedros Adhanom Ghebreyesus chuan ngaihven a la ngai hle tih a sawi.

MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh