delta variant hlauthawng

Brazil-ah hian inkai awlsam tak, Delta variant chu a la leng tak tak lo va, hei hian mi thiamte a tihlauthawng a, a darh leh chiam mai an hlauthawng hle.

Sorkara thurawn pe thin, Institute for Health Policy Studies-a executive director Miguel Lago chuan sorkar hotute chu an inhawn tak tak hmaa ngaihtuahna fing tak hmang turin a duh thu a sawi.

Lago chuan, “Tuna ni khata mi 500 thi an awm thin hi a thil tha tak a la ni phak chuang lo va, ram mipui zahve pawhin invenna bikim kan la la bawk si lo va, thil hlauhthawnawm tak a la ni reng,” a ti.

Brazil chu President Jair Bolsonaro-an hripui a hmachhawn dan duhkhawp lova mipui an thinrim mek laiin, khawvela mi 6,00,000 chuang coronavirus avanga thi an awm pahnihna a ni ta.

Bolsonaro-a hi coronavirus engah mah ngai lotu niin hriselna lama mi thiam leh Brazilian tam takte duh angin a hmachhawnpui lo va. Inkharkhip a duh lo va, vantlang himna tura inkhuahkhirhna dang pawh dovin COVID-19 vaccine pek pawh a ngai pawimawh lutuk lo.

Thla eng emaw zat chhung chu amah duh lohna lantir a ni tawh a, a sorkarin COVID-19 policy a neihte an dodal a, buk turin an nawr a,  Brazilian Senate committee pawhin April khan hripui a hmachhawn dan chu chhui turin a lo ti tawh bawk.

Zirtawpnia mellung lungchhiatthlak tak an tawn mek lai hian inkai darh lam erawh a ziaawm hret tawh a, invenna pek pawh bultan lamah muang mah se tihchak thar a ni mek.

Brazilian zinga 70% chuang chuan invenna dose khat tal an la tawh a, United State-a June thlaa mi 6,00,000-in an thihpui tlin khan an ram mipui 65%-in invenna dose khatna an la tawh.

“Vaccine la duh lova hnar hi an tlem hle a, hei hi ram dang ang lo tak a ni,” tiin Sao Paulo State University-a epidemiology hotu, Alexandre Naime Barbosa chuan a sawi a. “Hei hi Brazil-a hripui thununna tura kawng pawimawh ber a ni,” a ti bawk.

Brazil-ah hian inkai darh awlsam ber chi, Delta variant chu a la leng lutuk lo va, thi leh hri kai an tlakhniam hnuah he hri chi thar hian a luhchilh tan chauh.

April thlaa ni khata mi 3,000 chuang thi awm thin atang khan tunah chuan 80% velin an tlahniam tawh a. Ni khata thi tam berna pawh a ni lo.