US thil chhui miten an chhuina hi China chuan chhang nghalin a pawmpui loh thu an sawi.

Washington-a Chinese embassy chuan Reuters news agency hnenah an thuchhuah siam thawnin, “US-in  scientist-ten Covid-19 lo darh tan dan an chhuina leh an hmuh pawm lova hetianga chhuina hran a siam hi politics thil mai mai a ni,” an ti.

“Keini chuan science thiamna hmanga a lo intan dan chhuina hi kan pawmpui a, hemi chungchangah hian keini chu kan kal zel ang. Polices-a inbeihna atana he thil hman tumna reng reng chu keini chuan kan dodal tlat dawn a ni,” a ti.

China hian hri a darh tan atangin a bul tanna chhui hi a duh lo reng a, World Health Organisation-in a chhuinaah pawh a pui tha duh vak lo.

United States intelligence agency-te chuan  Covid-19 lo chhuahna tak (origin) chu hriat theih a nih a rinawm loh tih an sawi a, biological weapon atana siam erawh a ni lo niin an sawi.

Khawvel puma hri leng mek lo chhuahna chhui meknaa Office of the US Director of National Intelligence (ODNI)-in thuthar an tihchhuahah rannung atanga mihringa kai leh laboratory atanga put palh chu thil ni thei ve ve a nih thu a sawi.

An thutlukna mumal tak, ‘chu chu a ni e’ tih erawh siam theih a ni lo.

China chuan he report hi nasa takin a sawisel nghal.

Tun tuma thutlukna siam hi President Joe Biden-a sorkarin ni 90 chhung zirna an lo neih tawha an hmuh, August thlaa an lo tihchhuah tawh zir zui zela tihchhuah (update) a ni.

Intelligence agency-te zingah pawh hri lo chhuah danah hian inhnialna an la nei a. Agency pali chuan rannung atanga darh ni theia ngaihna an nei sang lo hle.

Agency pakhat chuan laboratory-a eng emaw tihsual palh vanga mihringin a kaia a darh zui ta anga ngaihna pawh thil ni thei takah a ngai a. Wuhan Institute of Virology-a thil enchhinna emaw, rannung zirna lam atanga darh palh thei a ni tih a sawi.

Chinese thuneitute chuan heng repost-te hi a sawisel nasa hle a. Kum 2019 tawp dawna Wuhan atanga hri darh tanah hi China chuan a intan dan chhui a duh lem lo va, a chhuitute pawh thil pawimawh hriat ngaite a hrilh tha duh vak lo bawk.

Chinese thuneitute hian Covid-19 hi Wuhan-a lui lam sa zawrhna atanga darh tan angin a tirah an sawi a. Scientist tam tak pawhin rannung atanga mihringin a kai niin an ring bawk.

Kumin kum tir lamah khan US chanchinbute chuan Wuhab laboratory atanga put chhuak tih finfiahna a awm angin an chhuah a; mahse, tih luih ni lovin a palha tihchhuah niin an tar lang.

May thla khan President Biden chuan thil chhui mite chu a intan dan chhui turin a ti ta a, lab atanga put ru palh a nih theih dan thlengin chhui turin a ti a, China erawh chuan chhui a duh lo hle.

Covid-19 hi khawvel pumah mi maktaduai 240 velin an kai tawh a, mi maktaduai 4.9 chuangin an thihpui tawh bawk.