DOWNLOAD OUR APP

Read latest news on your phone
app-store

Covid-19 hripuiin India a rûn zel

Apr 04, 2021

September 20 hnua kai thar tam ber ni

India ramah darkar 24 liam ta chhung khan coronavirus hri leng kai mi 89,129 zet hmuh chhuah thar an ni leh a, September 20 hnu lama a tam ber tum a ni.

September 20, 2020-ah khan mi 92,605-in an kai tih hmuh chhuah a ni.

Sorkar laipui chuan Maharashtra, Punjab, Karnataka, Kerala, Chhattisgarh, Chandigarh, Gujarat, Madhya Pradesh, Tamil Nadu, Delhi leh Haryana te chu hmalak chak ngaihna tiin a sawi a. Heng state leh union territory-te hi ram chhunga hri kai leh thihpui 90% zet awmna niin Zirtawpnia heng state a kawmnaah a sawi.

A tuar na ber, Maharashtra-ah mi 47,827-in an kai tih hmuh chhuah thar a ni a, March, 2020 atanga hripui a tawrh hnua ni khata a tam ber tum a ni a. State khawpui, Mumbai-ah pawh mi 8,648-in kaiin darkar 24 chhunga kai an tam ber tum a ni.

Hri hi a leng zui zel a nih chuan Maharashtra-ah hian inkharkhip kalpui a tum leh thei tih Chief Minister Uddhav Thackeray chuan Zirtawpni khan a lo sawi tawh.

“Mipuite hi an ngaih a tha tawh a, tunah hian dinhmun khirhah awm mekin kan ei bar dinhmun nge hriselna kan ngaih pawimawh ang?” tiin TV-a thuchah a sawiah a sawi lang.
 

Delhi-ah pawh hri hi a darh thar leh mek a, darkar 24 liam ta chhungin mi 3,594-in an kai tih hmuh chhuah niin kumina ni khata kai an tam ber tum a ni.

Thawhlehnia a thawh thum nana vote thlak tur, Tamil Nadu-ah chuan mi 3,290-in an kai tih hmuh chhuah a ni a, mi 8,92,780-in an kai ta.

Chhim lam state-ah hian mi 12,750 zetin an thihpui tawh bawk.

Karnataka pawh an buai leh hle tawh a, mi 4,991 kai thar awmin mi 10,06,229-in an kai tawh.

    India hian hri leng thawh hnihna a tuar tan mek a, hetih lai hian invenna damdawi pek runpui pawh a kalpui mek zel a. Mi vaibelchhe sarih chuang hnenah pek an ni   tawh.

Share now