India chuan coronavirus thawh hnihna a tawrh mekah dam lam a pan tan zel a, enkawl dama chhuahtir pung zelin May 10-a hri kai hmuh chhuah an tam ber ni atangin a hniam zawngin a la kal zel.

Damlo enkawl mek mi 22,28,724 an la awm a, union health & family welfare ministry chuan May 10-a hri kai hmuh chhuah tam ber ni hnu lamah a hniam zawng zelin a kal tawh tih nimin khan a sawi.

Darkar 24 liam ta chhungin mi 173,790-in coronavirus an kai tih hmuh chhuah leh a ni a, mi 3,617-in an thihpui leh hman bawk a. Mi 27,729,247-in an thihpui tawh.

Thi mi 3617 zinga mi 973 hi Maharashtra-a mi niin Tamil Nadu-ah mi 486, Karnataka-ah mi 401, Kerala-ah mi 194, Punjab-ah mi 176, Uttar Pradesh-ah mi 154, West Bengal-ah mi 145, Delhi-ah mi 139 leh Andhra Pradesh-ah mi 103 an thi bawk.

Ministry-in a chhinchhiahdan chuan Maharashtra-ah mi 93,198-in an thihpui tawh a. Karnataka-ah mi 27,806, Delhi-ah mi 23,951, Tamil Nadu-ah mi 22,775, Uttar Pradesh-ah mi 20,053, West Bengal-ah mi 15,120, Punjab-ah mi  14,180 leh Chhattisgarh-ah mi 12,915-in an thihpui tawh.

Ministry chuan darkar 24 liam ta chhung khan hri kai leh kai lo sample 20,80,048 endik a nih thu sawiin sample maktaduai 341.1 zet endik a ni tawh tihna a ni.