Delhi-ah thi nasa

Ram khawpui ber, Delhi-ah chuan ni 20 zet Covid-19 vanga thi an awm loh hnuah darkar 24 liam ta chhung khan mi pahnih thi an neih belh veleh ta.

Delhi-in hripui avanga thi an neih hnuhnung ber chu October 22 daih tawh kha a ni a. Mi pahnih thi an neih belh lehte nen hian mi 25,093-in an thihpui ta tih khawpui health department chuan a tar lang.

Hri leng thawh hnihna tuar na tak, Delhi-ah hian an dinhmun a tha sawt hle a. October thla chhung pawh khan thihpui mi pali chiah neiin September thlaah mi panga chiah an nei.

Delhi-ah hian mi 62 kai hmuh chhuah thar a ni bawk a, August 8 hnua ni khata an tam ber tum a ni. Endik atanga a kai hmuh 0.12% niin a hma ni aiin a sang hret bawk.

India ramah darkar 24 liam ta chhung khan coronavirus kai mi 11,850 hmuh chhuah leh hman an ni a, mi 3,44,26,036-in an kai ta.

Hri kai hmuh chhuah pung zel mah se enkawl dam an tam zawk zel avangin enkawl mek an tlahniam chak hle a, mi 1,36,308 chauh awm tawhin ni 274 hnua an tlem leh lai ber a nih thu union health ministry chuan a sawi.

Darkar 24 liam ta chhung hian mi 555 zetin hripui hi an thihpui leh hman thung a, mi 4,63,245 zetin an thihpui tawh.

India-ah hian ni khata hri kai hmuh chhuah hian ni 36 chhung chu a zawnin mi 20,000 an tling lo ta a. Mi 50,000 hnuai lam phei chu ni 139 a ni zawn tawh.

Hri kai enkawl lai hi a kai hmuh chhuah tawh zawng zawng a\anga chhuta 0.40% chauh ni tawhin March, 2020 hnua a hniam lai ber niin enkawl dam hi 98.26% an ni tawh a, March, 2020 hnua a san lai ber a ni bawk.

Darkar 24 liam ta chhung khan kai hmuh aiin enkawl dam an tam zawk avangin enkawl lai hi mi 1,108-in an tlem belh leh hman a ni.

Ni khata hri kai leh kai lo endik a\anga a kai hmuh chhuah zat bi pawh 0.94% chauh a ni a, ni 40 chhung a zawnin 2% hnuai lam a ni tawh.

Chawlhkar khat liam ta chhunga endik a\anga a kai hmuh hi 1.05% chauh a ni bawk a, hei pawh ni 50 chhung chu a zawnin 2% hnuai a ni tawh.

Invenna pek beihpui thlak zelah vaccine dose vaibelchhe 111.40 pek a ni tawh bawk.