Darkar 24 liam ta chhung khan India ramah hri kai thar mi 2,57,299 hmuh chhuah leh hman an ni a, mi 4,194-in an thihpui leh hman bawk.

Zirtawpni khan hri kai leh kai lo sample 20,66,285 endik a ni a, hei hi ni khata endik a tam ber tum a ni.

India ramah tun hnai chawlhkar khat chhungin ni tin hri kai mi nuai hnih chuang hmuh chhuah thin an ni a. April 21 hnuah kar tir atang khan mi nuai thum tling lo a ni ta zel. 

May 15 hnua coronavirus hripui kaihhnawih natna avanga nunna chân tawh zawng zawngte chu mi 30,000 dawn lai an awm tawh.

Hri kai leh lai loh enna tha bera ngaih, RT-PCR chu thla thar atang hian 40% laiin tun aiin hman tlem tur tiin sorkar laipui chuan thuchhuah a siam. 
A tha lo zawka ngaih, antigen test-ah sorkar chu 60%-ah a innghat dawn a, June thla tawp atanga ni khata nuai 45 tal test neih tum vang a ni.

Prime Minister Narendra Modi-a’n state sorkar hnenah thla hnih kalta khan test zawng zawng 70% chu RT-PCR hman tur a ni a, kai hmuh chhuah thar an tam a nih pawhin phurritah tumah insiam phah lo tur tia a puan hnuah tuna ruahmanna hi an siam danglam leh ta a ni.

Rajasthan Health Minister Raghu Sharma chuan Covid-19 dam tawh mi 700-in Black Fungus an kai tih hmuh chhuah a nih thu a sawi.

Union Health Ministry chuan Zirtawpni khan Covid-19 indanna vaccine dose a pekchhuah tawh zawng zawng chu nuai 1932 a tling tawh niin an puang.