US President Joe Biden chuan an ram chu Covid-19 lakah a fihlim tih a puang ta rup mai. Hetih lai hian US-ah hian Covid avanga thi an la awm reng a, Bidena thusawi hi a dik tawk lo niin a lang. 

Kum 79 mi Joe Biden hian hemi chungchang hi Pathianni khan interview-ah a sawi chhuak a, eng vanga he thu hi sawi nge a nih hriatthiam a har hle. US-ah hian nitin mi 400 vel chu Covid avang hian an la thi ziah a, Covid-19 public health emergency hlih a la ni lo bawk. 

US-ah hian January 2020 atang khan Covid-19 public health emergency hi puan a ni a, thla hmasa August mai pawh khan October thla thleng atan an la pawtsei cheu. Heti chunga an ram President berin Covid lakah an fihlim thu a puang ta mai hian maktih a hlawh hle a ni. 

Johns Hopkins University te data atanga a landan chuan tun thla tir lam khan US-ah hian nitin mi 3,000 vel chu Covid avangin an thi ziah anga chhut a ni a, karliam ta khan 400 velah a tlahniam chauh a ni. World Health Organization (WHO) pawhin Covid-19 pandemic chu a lo tawp lo tih a tarlang bawk.