Khawvel ram hrang hrangte chu tun hnaia Covid-19 chi thar, Omicron an tih chu an rama a luh lohna turin Africa khawmualpui chhim lam ram nena intlawhpawhna an dangping mek zel.

Hriselna lama thuneituten he hri chi thar hi a hming an vuah hnu lawkah hetiang hian ramte hian hma an la.

Omicron hi hri awm hmasa tawhte atanga vawi tam insiam danglam atanga lo chhuak a ni a, tuna hriat theih chinah a lo kai tawhte pawhin an kai nawn awlsam hle niin an hria tih WHO chuan a sawi.

Hetih lai hian South Africa atanga Amsterdam khawpuia tum lut mi za chuang chuan he variant hi an kai tih hmuh chhuah a ni.

KLM thlawhna pahniha chuang mi 61 vel chuan Covid-19 an kai ngei a, thlawhna tumhmun bul lawkah khung hran an ni a, endik nawn leh an ni dawn tih Dutch thuneitute chuan an sawi.

Cape Town atanga Manchester tlawh kuala Amsterdam-a lutte hian Dutch khawpuia Schiphol Airport-ah darkar li lai thlawhna chhuahsan phal an nih loh hnuah an chhuah chauh tih an sawi.

Netherlands ram hi hri leng kai pung chakin a tibuai mek a. Pathianni a\ang khan inkharkhip nem chi kalpuiin bar, thingpui dawr leh dawr tam zawkte inhawn hun an titawi.

Omicron variant hi November 24 khan South Africa atangin hmuh a nih thu World Health Organization-ah thlen a ni a. Botswana, Belgium, Hong Kong leh Israel-ah pawh kai an awm tawh.

South Africa, Namibia, Zimbabwe, Botswana, Lesotho leh Eswatini ram atangin UK luh phal a ni lo nghal a. A lut thei chu UK leh Irish mi emaw, UK-a cheng nghet chauh an ni.

United States thuneitute pawhin South Africa, Botswana, Zimbabwe, Namibia, Lesotho, Eswatini, Mozambique leh Malawi atanga an rama luh an khap nghal a. A hma lawkin EU ramte pawhin an lo khap tawh a, heng khapna hi Thawhtanni atangin an kalpui ang.

WHO chuan he variant, B.1.1.529 tia an sawi bawk hi South Africa-a province zawng zawngah a darh chak hle tih a sawi. 

“He variant hi vawi tam insiam danglam tawh a ni a, thenkhat hi chu ngaihven ngai tak an ni,” tiin UN hnuaia vantlang hriselna lam buaipuitu pawl hian thuchhuah a siamah a tar lang.

B.1.1.529 kai hriat hmasak ber hi November 9-a specimen lak zinga mi a nih thu a sawi bawk.

WHO chuan a nihna kimchang hre tur chuan chawlhkar eng emaw zah hun a la ngai dawn tih a sawi a. Scientist-te chu a inkai theih dan leh a awlsam dan zirin an buai mek tih a sawi bawk.

UK-a hriselna lama hotu lian pakhat chuan khawvelin vaccine a hman laite chu he hri thar lakah hian a ‘thawk  nep’ dawn niin a sawi bawk.

Professor James Naismith, University of Oxford-a structural biologist chuan, “Chanchinthar lawmawm loh tak a ni ngei a; mahse, tawpna tur ni erawh a ni lo,” a ti bawk.