inven ngai pawimawh lo

Russia-ah hian mipuiin invenna damdawi an la tha duh lo hle a, sorkarin a la lote vau nasa hle mah se an pun phah lem lo.

Dose hnih lak ngaiah a bikima la tawh leh dose khat chauh la an inzat thuak a, an ram mipui hmun thuma thena hmun khat vel chauhvin an la la.

Mipui nawlpui chuan invenna lak hi an duh lo va, tun hnaia ngaihdan lakah pawh lak tum lem lo chu 50% dawn an ni.

Russia hi invenna siam muang pawh a ni lo va, Sputnik V an tih chu nikum daih tawh khan an siam chhuak a, a hnuah pawh a dang pathum pawm turin an pawm tawh bawk.

Sputnik V hi ram dangah pawh an hralh chhuak nasa hle a; mahse, an ram chhungah ber hian mipuiin an hmang duh mang tlat lo thung chu an buaina lian ber a ni.

Russia-ah Inrinni khan ni khata Covid-19 thihpui mi 1,000 an awm tling a, hripuiin a nuai hnua thi an tam ber tum a ni.

Kar liam ta chhung khan hripui thihpui hi a sang zawngin a kal a, Kremlin chuan Russian mipuite chu invenna an lak duh loh avanga hetiang hi tawngah a puh.

An ram mipui hmun thuma thena hmun khat vel chauhvin invenna hi an la la a, mi tam takin vaccine hi an la duh lo.

Russia-ah hian Covid-19 thihpui mi 2,22,000 chuang an awm tawh a, Europe-a thi an tam berna niin Inrinni khan mi 33,000 chuang kai hmuh an ni leh bawk.

Sorkar chuan an ram ei leh bar dinhmun ngaihtuah tel a ngaih avangin inkhuahkhirhna khauh tak kalpui a remti lo va. Hetih rual hian Kremlin chuan mipuite chu invenna lak lamah tan la turin a sawm.

Kremlin thupuangtu, Dmitry Peskov chuan tun kar khan, “Hri kai an pun chak mek laiin mipuite hnenah invenna lak pawimawhzia hrilh reng a la ngai a. An ngai pawimawh lo va, mi a tihlum mek si,” a ti.

Sorkar chuan an damdawi in, hmanrua leh thawktu lamah buaina a awm lo tih an sawi a, damlo pung zel mah se an dawl zo dawn niin an insawi.

Hetih lai hian Health Minister Mikhail Murashko chuan Covid-19 hlauh vanga mi enkawl chawlhsan doctor-te chu invenna laa an hnaa kir leh turin a sawm.

Russia-ah hian hri kai enkawl lai hi mi 7,50,000 an la awm mek a, February, 2020 hnu lama an tam lai ber a ni.

Hri a len tan atanga kai tawh zawng zawng hi maktaduai riat dawn a ni tawh bawk.