Inkai awlsam tak, Omicron-in a thlen kal zelah United States-ah chuan COVID-19 avanga thi chu mi 9,00,000 an tling ta tih Johns Hopkins University chuan a tar lang a. Thla hnih pawh tling lo chhungin mi nuaiin an thihpui hman tihna a ni.

Zirtawpni kha US-ah hian invenna an pek atanga thla 13-na a ni tawh a; mahse, invenna chungchanga rinhlelh leh hriat chian loh thil leh politics thila beihna avangin la duh lo an la tam hle.

“Thihpui an tam hle a ni,” tiin Brown University School of Public Health-a dean Dr Ashish K Jha chuan a sawi.

“Kum hnih liam taah khan American tam zawk hian hripui avangin kum rei lote chhungin mi   900,000 an thi dawn tih kha an awih lo a ni,” a ti.

Thihpui an pun mek lai hian Omicron hi a kai an tlem hret hret tan nia hriat a ni a. A kai hmuh hi state 50 an neih zinga 49-ah chuan a hniam zawngin an kal a. Ni khata thi erawh 2,400 vel ang a ni a, nikum thlasik hnua a san lai ber a ni.

US hi khawvela coronavirus thihpui an tamna ber ram a ni a; hemi bakah hian COVID-19 avang emaw, a kaihhnawiha thihpui nen vek chuan an tam lehzual dawn hle a ni.

United States-ah thihna tam

COVID-19 hi US-ah chuan miin an thihpui tam ber pathumna niin lung natna leh cancer dawta an thihpui tam ber a ni a. Hriselna lama mi thiamte chuan US policymaker-te chuan invenna pek lamah hian kal dan tur tha zawk an hre tawh lo niin an sawi.

American 64% (mi maktaduai 212) vel chu invenna bikimin an la tawh niin US Centers for Disease Control & Prevention (CDC) chuan a sawi.

December, 2020 lai hawlah khan invenna pek tan niin hetih lai hian mi 3,00,000 velin an thihpui a. June, 2021-ah mi 6,00,000 tlingin October 1-ah mi 7,00,000 an tling a. December 14-ah 8,00,000 an tling leh.