Union health ministry chuan Thawhlehni thleng khan ram pumah Covid-19 chi thar, JN.1 kai mi 109 finfiah a ni tawh tih a sawi.

Heng zinga mi 36 chu Gujarat-a mite niin a tam ber a, Karnataka-ah 34, Goa-ah 14, Maharashtra-ah pakua, Kerala-ah paruk, Rajasthan leh Tamil Nadu-ah pali ve ve leh Telangana-ah pahnih an ni.

Coronavirus chi thar darh leh mek chungchangah Gangaram Hospital Chest Medicine Department Vice Chairman Dr Bobby Bhalotra chuan, “A chi thar hi a thawk na lo va, Omicron chhungkuaa mi tho a ni a. A kai hmuhte avang hian lungngai tur a ni lo va, chiaina tur a awm lo va; mahse, he hri hi a lo kir leh tih erawh a lang a. A pangngai ai khan inkai a awl avangin a darh chak viau thei a, fimkhur tan a ngai hle a ni. Inven hi tihdam aiin a tha a, inven chuan kan tidarh lo a ni,” a ti.

“OPD-ah pawh sik leh sa inthlak avang te, tlang hri leng leh khawpui bera boruak bawlhhlawh avang ten thawk lama harsatna nei damlo inentir 20-30% velin an pung,” a ti bawk.

Thawhah, chuap lama harsatna nei sate chu hri leng leh swine flu hian a ngam bik niin a sawi.

World Health Organization (WHO) chuan JN.1 hi tun hnai khan ngaihven ngai huangah a lo dah tawh a, BA.2.86 atanga kal hrang a ni tih a sawi a. Hetih rual hian tun thleng hi chuan JN.1 thawh nat dan leh a darh chiam theih dan hi a la hniam rih hle tih a sawi.