Darkar 24 liam ta chhungin India-ah Covid-19 kai mi 702 hmuh chhuah belh an ni leh ta a, a vei mek mi 4,097 an awm tling leh ta tih health ministry-in Ningani khan a puang.

Hetih chhung hian Maharashtra-ah mi pahnih leh Karanataka, Kerala, West Bengal leh Delhi-ah mi pakhat theuh, an vaiin mi parukin hri hi an thihpui leh hman bawk.

India-ah hian December 22 khan hri kai hi mi 752 hmuh chhuah a lo ni tawh bawk.

Ni khata hri kai hmuh zat hi December 5 khan mi 100 tling lovah a tlahniam hman a; mahse, tun hnaiah a chi thar lo chhuak avang leh thlasik vawt tak lo thleng avangin a pung leh mek.

India-ah hian Covid a len nasat vanglai khan ni khatah a kai hmuh hi nuai chuang chuang a ni a, hei hi kum 2020 chawhma lam atang khan niin tun thlengin mi vaibelchhe 4.5 chuangin an kai tawh a, mi nuai 5.3 chuangin kum li chuang chhungin an thihpui tawh.

Covid kai enkawl dam tawh pawh an tam hle tawh a, mi vaibelchhe 4.4 chuang enkawl dam tawh niin a kai zinga 98.81% chu enkawl dam an ni tih ministry website chuan a tar lang a. Invenna pek kal zelah dose vaibelchhe 220.67 chuang pek a ni tawh bawk.