ZALEN April 15, 2025 : Mizoram sawrkara centrally sponsored schemes (CSS) hnuaia hnathawk te chuan dahngheh ngiatin vawiin atang khan nawrh an tan a, an chet lek dan avanga Chief Secretary charge latu thusawi an hrethiam lo. Mizoram chief secretary charge la mektu H. Lalengmawi hian in-ban pawh thleng theih a nih thu a sawi a ni.

Mizoram sawrkara principal secretary hna chelh mek H. Lalengmawia chuan vawiina press conference-a neih-ah lungawilohna lantir mek All Mizoram CSS Employees Coordination Committee (AMCECC) te chet dan chu sawrkarin an ngai thutak a ti a, lungawi lohna an lantir zel a nih chuan hreh tak chungin in-ban pawh thleng thei a ni a ti.

H. Lalengmawia chuan AMCECC hruaitute nen pawh inbiakna an nei tih a sawi a, nuar lo tur hian an ngen a ti a, state sawrkar chuan CSS hnuaia hnathawk te ngheh dan turah hian sawrkar pawhin office memorundum an tihchhuah a ni tawh a ti.

CS charge latu chuan, "AMCECC hruaitute hnenah hian ngena siam a nih tawh chungin pen/tools down strike hi an kalpui lui tlat a ni. Department of Personnel & Administrative Reforms (DP&AR) chuan state sawrkar recruitment rules hnuaiah an ngheh theihna tur hian office memorundum pawh an tichhuak vek tawh a ni," a ti.

Thawktu singkhat chuang awmna AMCECC chuan, "Pen/Tool Down Strike kan neih hnuah hian Mizoram sorkar chuan inbiakna mumal engmah min la neihpui lova. Chutihmek lai chuan Chief Secretary Charge la mektu chuan Press Conference-ah CSS hnuaia dan loa lak te chu dahngheh theih an nih loh thu a sawi leh, AMCECC thil phut an tih hlawhtlin chuan India Constitution bawhchhiat a ngaih dawn thu a sawi hi hriatthiam har kan ti," an ti ve thung.

"CSS te dinhmun hrechiangtu kan sawrkar chuan CSS te dahngheh theihna tur dan ‘Govt, of Mizoram Regularization of CSS Employees Scheme, 2024’ chu duhsak takin min siamsak a, he dan hi a taka kan hman ngei theih nan kan Chief Minister zahawm tak pawhin a theihna dan zawng hram hram tura thuneitute a chah laiin, min dahngheh theih nan hma la lova, a harsatna leh a theihlohna dan min zawn sak zel tu an la awm fo hi kan duh lo. Mizoram sawrkar hian a duh chuan CSS hnuaia thawk te a lo dah ngheh fo tawh thin a, keini aia mumal lova lak te pawh dahngheh an lo ni tawh thin a ni," an ti bawk.

AMCECC chuan an member dan lova lak an awm an hre lo, an ti a, sawrkar appointment order mumal tak nei veka lak an ni a, dan dik loa lak an awm a nih chuan dan loa latu chu sawrkarin chhui chhuakin, a mawhphurtute chungah na taka hmala turin an phut bawk a ni.